Komuna e Prizrenit synon transformimin e “Bazhdarhanes” me rreth rrotullim, rrugë më të gjerë dhe parkingje të reja

Pas rrënimit të ndërtesës së ish-ndërmarrjes “Liria” në lagjen “Bazhdarhane”, Komuna e Prizrenit ka filluar projektin për ndërtimin e një rreth rrotullimi në këtë zonë dhe zgjerimin e rrugës. Në plan ka edhe ndërtimin e parkingjeve të reja.

Drejtori i Shërbimeve Publike në Komunën e Prizrenit, Çelë Lamaj ka sqaruar se synimi është që të funksionalizohet komunikacioni në këtë pjesë të qytetit.

“Te ish-objekti i “Lirisë” mendohet të zhvillohet një projekt, jo vetëm ndërtimi i rreth rrotullimit, po edhe zgjerimi i rrugës deri te rrethi tjetër në “Bazhdarhane”, ku do t’i ketë katër korsi. Normalisht që ky projekt përmban edhe një vend stacion për ndalesë të autobusëve dhe një vend parking të taksive. Kështu që kjo pjesë do të rregullohet në mënyrë shumë profesionale”, ka thënë Lamaj, raporton Telegrafi.

Sipas tij, punëkryesi, gjeodeti dhe inxhinierët e DShP-së kanë dalë në terren për të përcaktuar kuotat, dhe se ditëve në vijim, do të vijojnë punimet.

“Ky projekt deri ka fundi i këtij muaji apo java e parë e muajit prill do të na përfundojë”, është shprehur zyrtari i lartë komunal.

Lamaj ka sqaruar se në afërsi parashihet edhe ndërtimi i parkingjeve, që pastaj lidhet me rreth rrotullimin e ri.

“Prapa Shtëpisë së Bardhëve, do të bëhen një numër i madh i parkingjeve. Vetëm jemi në procedurën e vlerësimit të projektit, me përzgjedhë projektin më të mirë, i cili detyrimisht do të na lidh me këtë rreth rrotullimin këtu”, ka bërë të ditur ai, raporton Telegrafi.

Konkursi i projektimit me vlerën e parashikuar prej 100 mijë eurove për hartimin e projektit detal për ndërtimin e parkingjeve prapa Shtëpisë së Bardhë është shpallur gjatë këtij viti.

Lamaj tutje ka theksuar se planet e mëtejme janë edhe për vendosjen e një skulpture të Vrapueses së Prizrenit.

Lexo po ashtu Rruga “Adem Jashari” në Prizren me rreth rrotullim të ri, punimet fillojnë të hënën

“Pasi që të përfundon ky rreth rrotullim dhe kjo infrastrukturë, projekti tjetër i ardhshëm, në këtë pjesë është edhe vendosja e një ikone të Prizrenit, pra Vrapuesja e Prizrenit. Do të jetë një vepër, një skulpturë, e punuar nga ndonjë artist, dhe them se kësisoj do të jetë një pjesë mjaft atraktive e hyrjes së qytetit të Prizrenit”, ka thënë Lamaj.

Ndërtesa e ish-ndërmarrjes “Liria” ishte rrënuar në vjeshtën e vitit të shkuar. /Telegrafi/