Këshilltari i Osmanit: Kërcënimi i Gjergj Dedajt është çështje që duhet të trajtohet nga organet e drejtësisë

Pas deklaratave të ish-ambasadorit, Gjergj Dedaj, ku tha se “Klani i Osmanit” po e linçon dhe se ai do të përdorë “Kanunin për t’u mbrojtur”, ka reaguar Bekim Kupina, këshilltar i presidentes Vjosa Osmani.

Përmes një shkrimi në Facebook, Kupina ka thënë se Dedaj ka kërcënuar Presidenten dhe familjen e saj me ato deklarata.

Tutje e ka quajtur Dedajn person të papërgjegjshëm, që sipas tij “për shkak të interesave meskine dhe prapaskenave të ulëta është katapultuar në pozitën e ambasadorit pa i plotësuar kriteret themelore, manipulon, përvetëson dhe kërcënon kreun e shtetit”.

“Pa asnjë hezitim, ai përdorë deklarimin në një emision live për të bërë kërcënim kundër jetës dhe sigurisë ndaj Presidentes Osmani dhe familjes së saj, për të cilën gjë ai do të denoncohet në organet e rendit”, shkroi Kupina.

Lexo po ashtu Dedaj thotë se ndjehet i rrezikuar nga “Klani i Osmanit”, paralajmëron hakmarrje përmes Kanunit

Sipas tij, kërcënimi i Dedajt është çështje që duhet të trajtohet nga organet e rendit dhe të drejtësisë.

“Nuk arsyetohet në asnjë mënyrë dhënia e hapësirës mediale një personi, recidivist i keqpërdorimit të historisë familjare në funksion të përfitimeve personale. Mediat nuk janë klinika për shërimin e komplekseve, prandaj të tillë persona duhet shmangen nga prezantimi publik në funksion të ruajtjes së higjienës në sferën e komunikimit me publikun”, ka shtuar ai.

Dedaj në Frontal tha se është njeri i ligjit, por tutje theksoi se përveç ligjit, te ai dhe familja e tij që vjen nga Malësia e Gjakovës, vepron edhe Kanuni i Lekë Dukagjinit.

“Unë jam i ligjit, mirëpo na jemi shqiptarë. Nuk mundesh dikë që ja ki inati me e vra. Unë jam i rrezikum, nga Klani i Osmanit, i Vjosës dhe bashkëshorti i saj, nga njerëzit e saj dhe i listës Guxo. Nuk di që duhet me pasë kërcënim tjetër kur ta rrezikon jetën, të len të paftyrë, të hejk prej listës së pagave”, tha Dedaj./Telegrafi/