Rritet kërkesa për energji elektrike, KESCO me apel për qytetarët

Kompania Kosovare për Furnizim me Energji Elektrike (KESCO) njoftoi se me uljen e temperaturave është shtuar kërkesa për konsum të energjisë elektrike, kryesisht për qëllime ngrohjeje.

Sipas KESCO, ditët e para të nëntorit kanë shënuar një rritje të kërkesës për rreth 18% në krahasim me të njëjtën periudhë të vitit të kaluar. Gjatë pikut, kërkesa për energji ka kaluar mbi 1100 megavat për orë.

KESCO u kujton konsumatorëve se Kosova aplikon tarifa që inkurajojnë kursimin e energjisë elektrike; sa më pak të konsumojnë, aq më të ulëta do të jenë faturat, jo vetëm për sasinë e energjisë, por edhe për çmimin.

Tarifat janë të ndara në dy blloqe: deri në 800 kWh dhe mbi 800 kWh, ku konsumi mbi 800 kWh ka tarifa më të larta. Për këtë arsye, kompania këshillon konsumatorët të kursejnë energjinë dhe të shmangin ngrohjen me energji elektrike kur kjo është e mundshme.

KESCO gjithashtu rekomandon përdorimin e pajisjeve dhe metodave efikase për ngrohje, duke ruajtur një temperaturë optimale në hapësira. Si një referencë, kompania përmendi se gjatë krizës energjetike, shumë vende evropiane kishin kufizuar temperaturën e brendshme të mos kalonte 19°C gjatë dimrit.

Në javët në vijim, KESCO planifikon të nisë një fushatë sensibilizuese për kursimin dhe përdorimin efikas të energjisë elektrike, e titulluar “Deri n’800!”