Kamerat kineze nga lista e zezë amerikane në Kosovë, flasin nga Qeveria

Çdo lëvizje vëzhgohet nga kamerat e kompanive kineze në objektin e qeverisë. Kamera të tilla janë edhe në institucionet e tjera publike dhe në sheshet e kryeqytetit dhe në veriun e Mitrovicës.

Sistemet e mbikëqyrjes së dy kompanive kineze “Dahua”dhe “Hikvision”, të cilat po përdoren në Kosovë, sipas autoriteteve amerikane, janë të ndaluara dhe janë të vendosura në listën e zezë, meqë po konsiderohen të paligjshme dhe nuk janë në përputhje me politikat e Shteteve të Bashkuara të Amerikës.

Qeveria e Kosovës, në një përgjigje për RTK-në, ka thënë së tashmë ka filluar rishikimin e kontratës që është nënshkruar në vitin 2019.

“Jemi interesuar për këtë çështje. Bëhet fjalë për kontrata të trashëguara nga qeveritë e kaluara. Ne do t’i shohim ato dhe do të analizojmë aspektin e sigurisë të produkteve që ato kontrata ofrojnë”, ishte përgjigjja nga Qeveria.

Lexo po ashtu Kamerat kineze nga lista e zezë amerikane, përmes Serbisë në Kosovë

Nga kompania “Profesional alarm” e cila është përfaqësuese e produkteve “HikVision,” është kontaktuar nga RTK, kanë thënë përmes telefonit se kanë pasur takime me zyrtarë të Ministrisë së Industrisë dhe Ndërmarrësisë për ta zgjidhur këtë çështje, por kanë lënë të nënkuptohet se ky problem  do të zgjidhet javën e ardhshme por nuk folur para kamerës për këtë çështje.

Ndërsa kompania tjetër “Profiti grup” që është përfaqësuese e “Dauha”, nuk kanë pranuar të flasin për këtë temë.

Por, sipas ekspertëve të sigurisë, qasje në të dhënat e këtyre pajisjeve mund të kenë edhe personat e tjerë, pa dijeninë e atyre që monitorojnë kamerat.

“Ato kamera mundësojne njohjen e fytyrës, të dhënat e qarkullimit të personave, munden me mbajtë intenzitetin e të dhënave dhe ato të dhëna mundë të përdoren nga kecperdoruesi sic është kina për t’i shitur ato të dhëna ose përmes atyre të dhënave me kriju drafte që mundë të rrezikohen”, tha Granit Beka, ekspert i sigurisë.

Burimet brenda Doganës kanë thënë për RTK-në se këto pajisje janë të ndaluara për import në Kosovë, pas vendimit të vitit 2021 të ish-kryeministrit Avdullah Hoti, me të cilin synohej zbatimi i sanksioneve të vendosura nga SHBA,OKB dhe EU.

RTK ka kontaktuar edhe ish-kryeministrin Avdullah Hoti, por ai nuk është përgjigjur.