Ka ndërruar jetë në moshën 119-vjeçare japonezja Kane Tanaka, personi më i vjetër në botë

Kane Tanaka, personi më i vjetër në botë, ka vdekur në Japoni në moshën 119-vjeçare, sipas një deklarate të lëshuar nga Ministria e Shëndetësisë, Punës dhe Mirëqenies së vendit.

Tanaka, që lindi më 2 janar 1903, vdiq më 19 prill, tha ministria, shkruan CNN, përcjell Telegrafi.

Duke postuar në Twitter për vdekjen e saj, Guinness World Records tha: “Ajo u bë personi më i vjetër i gjallë në janar të vitit 2019 në moshën 116 vjeç e 28 ditë”.

“Ajo është gjithashtu personi i dytë më i vjetër i regjistruar ndonjëherë, pas vetëm Jeanne Calment, e cila jetoi deri në moshën 122-vjeçare”.

Familja e Tanaka tha në një postim në Twitter në fillim të këtij muaji se ajo kishte qenë shpesh e sëmurë kohët e fundit dhe “brenda dhe jashtë spitalit”.

E lindur në vitin 1903, Tanaka u martua me një pronar dyqani orizi në moshën 19-vjeçare dhe punoi në dyqanin e familjes deri në moshën 103-vjeçare.

Ajo i mbijetoi dy herë kancerit dhe jetoi një sërë ngjarjesh historike, duke i mbijetuar dy luftërave botërore dhe gripit spanjoll të vitit 1918 – si dhe pandemisë së shkaktuar nga Covid-19. /Telegrafi/