Jese zbulon prapaskena shokuese te PSG: Presidentit i pëlqente gruaja ime më shumë se unë

Ish-lojtari i Real Madridit, Jese Rodriguez, është në qendër të vëmendjes pas një interviste bombastike, ku bëri pretendime të bujshme për kohën e tij në Paris Saint-Germain.

Jese filloi rrugëtimin e tij në Real Madrid, duke luajtur 28 ndeshje në La Liga dhe duke kontribuar në fitimin e Ligës së Kampionëve. Megjithatë, në vitin 2016, ai u transferua te PSG për 25 milionë euro në një kontratë pesëvjeçare. Sidoqoftë, karriera e tij në Francë nuk ishte aspak e suksesshme. Pasi iu nënshtrua një apendektomie, ai humbi vendin e tij në skuadër dhe arriti vetëm 18 paraqitje në katër vjet.

Në një intervistë me Mowlihawk, Jese zbuloi detaje intriguese për kohën e tij në Paris.

“Fillimisht, gjithçka ishte mirë, por më pas mbeta jashtë fushës për muaj të tërë për shkak të apendiksit dhe humba vendin tim në ekip. Në dimër, më thanë se duhej të shkoja në huazim. Ia shpreha zhgënjimin tim Emerys sepse u ndjeva i tradhtuar. Presidenti i klubit as që donte të takohej me mua. Ndoshta i ka pëlqyer më shumë gruaja ime se unë”, ka thënë futbollisti.

Gruaja e Jese, Aura Ruiz, është një influencuese e njohur spanjolle dhe një ish-konkurrente në reality shoun popullor Supervivientes. Ajo është shumë aktive në Instagram, duke ndarë foto personale dhe nga pushimet me mbi 650,000 ndjekësit e saj.

Çifti u martua në vitin 2022, megjithëse lidhja e tyre më parë kishte tërhequr vëmendjen e mediave për skandalet dhe momentet dramatike. Në vitin 2018, dyshja vendosën të ndaheshin kur Aura akuzoi Jesen për pabesi dhe neglizhencë të djalit të tyre të lindur para kohe. Jese, nga ana tjetër, pretendoi se Aura nuk po i kushtonte vëmendje të mjaftueshme fëmijës së tyre. Në një incident famëkeq, Aura dyshohet se u përpoq të godiste futbollistin me një makinë pas një debati. /Telegrafi/