Jep dorëheqje një anëtar i Bordit të RTK-së

Ka dhënë dorëheqje anëtari i Bordit të Radiotelevizionit të Kosovës (RTK), Ilir Bytyçi.

Dorëheqja e Bytyçit vjen një ditë pasi Komisioni për Administratë Publike, Pushtet Lokal, Media dhe Zhvillim Rajonal ka votuar rekomandimin për shkarkimin e Bordit të Radiotelevizionit të RTK-së.

Në letrën e dorëheqjes, që ka siguruar Telegrafi, Bytyçi ka shkruar se dorëheqje ka dhënë në shenjë pakënaqësie dhe pamundësie për të bërë ndryshime në Bord dhe Menaxhment si dhe me gjithë situatën e krijuar në RTK.

“Gjatë kësaj periudhe gati 9-mujore sa isha në bord, me qëllim të ngritjes së llogaridhënies dhe transparencës jam munduar të jap kontributin tim profesional në shumë fusha. Ndër to, kam iniciuar kërkesën që RTK-ja t’i nënshtrohet auditimit për vlerësimin e performancës dhe gjendjes financiare nga Zyra Kombëtare e Auditimit, kërkesë kjo që më 22 prill u pasua me vendimin për deklaratën publike nga Bordi për auditimin e RTK-së”, ka shkruar ai në letrën e dorëheqjes. Prandaj në shenjë pakënaqësie dhe pamundësie për të bërë ndryshime në Bord dhe Menaxhment si dhe me gjithë situatën e krijuar në RTK, unë jap dorëheqje për arsye morale dhe profesionale”, thuhet në letrën e dorëheqjes.

Lexo po ashtu Komisioni voton rekomandimin për shkarkimin e bordit të RTK-së

Pas votimit të rekomandimit në Komision, shkarkimi i bordit të RTK-së pritet të votohet në Kuvend të Kosovës. /Telegrafi/