Lajme Kosovë

Ish ministrja Hajdari reagon pas shkarkimit të bordeve: Qeveria Hoti po punon për shtetin e kapur

Para 4 vitesh

Ish ministrja e Tregtisë dhe Industrisë, Rozeta Hajdari ka reaguar pas shkarkimit të bordeve nga Qeveria Hoti, e që janë emëruar në kohën e Qeverisë Kurti.

Ajo ka thënë Qeveria Hoti po punon për shtetin e kapur dhe kundër Kushtetutës e ligjit.

Hajdari në një postim në Facebook shkruan se në vazhdën e papërgjegjësive, pabesisë dhe shkeljeve ligjore, qeveria Hoti ka shkarkuar bordet e drejtorëve të katër ndërmarrjeve publike: Korporatës Energjetike të Kosovës, NPH Ibër-Lepencit, KRU Prishtinës, KRU Hidroregjioni Jugor Prizren.

Lexoni të plotë postimin e saj në Facebook:

“Në vazhdën e papërgjegjësisë, pabesisë dhe shkeljeve ligjore, qeveria Hoti paska shkarkuar bordet e drejtorëve të katër ndërmarrjeve publike: Korporata Energjetike e Kosovës, NPH Ibër-Lepenc, KRU Prishtina, KRU Hidroregjioni Jugor Prizren.

Vendimet i ka nënshkruar zëvendësja e Avdullah Hotit, por pa e bërë të qartë se po firmos në emër të tij. Kurse Qeveria, si aksionare, ka nxjerrë vendimet pa bashkëngjitur arsyetimin e shkarkimit. Pse? Sepse ligjërisht s’ka arsye për shkarkim.

Shkaqet i mësojmë nga kërkesat e vazhdueshme që ministri përgjegjës Blerim Kuçi u ka bërë bordeve: të pezullojnë konkurset për zyrtarë të lartë të ndërmarrjeve, siç janë kryeshefat dhe zyrtarët kryesorë financiarë.

Por ligji nuk i lejon aksionarit të merret me këtë çështje. Sipas nenit 21 të Ligjit për Ndërmarrjet Publike, procedura e konkursit dhe përzgjedhja e zyrtarëve të lartë të ndërmarrjes janë kompetencë ekskluzive e drejtorëve. Ndonëse aksionari mbikëqyr bordin dhe mund të komunikojë drejtpërdrejt me drejtorët, neni 7.6 LNP përcakton qartë: ‘Detyrimi për mbikëqyrje […] nuk do të ushtrohet në një mënyrë që ndërhyn, ose ka për qëllim të ndërhyjë, me veprimtarinë ose pavarësinë e Bordit të Drejtorëve ose Komisionit të Auditimit të një NP’. Vendimet e qeverisë Hoti tani shpërfaqin përpjekjet e saj për t’i kapur ndërmarrjet, duke u diktuar drejtorëve se si duhet t’i kryejnë ata detyrat e veta ligjore.

Rrethanat në ndërmarrje nuk kanë lejuar pezullimin e konkurseve. Në ushtrimin e kompetencave të tyre të ligjshme, drejtorët kanë vendosur të largojnë disa zyrtarë të lartë, të cilët kanë qenë përgjegjës për humbjet që kanë përjetuar ndërmarrjet. Pastaj kanë vlerësuar se pozitat e tyre të zbrazëta duhet t’i plotësojnë sa më parë. Ankesat dhe paditë e zyrtarëve të shkarkuar, që z. Kuçi i ka përmendur shpesh si shkas për pezullim konkursesh, janë krejt të pabaza dhe nuk duhet të ndalin punën e drejtorëve. Kurse bashkëpunimi i Qeverisë me Ambasadën Britanike, sado i mirëpritur, nuk mund t’u mohojë të drejtat palëve të treta as të zhbëjë proceset e nisura në ndërmarrje.

Rekrutimi i zyrtarëve të lartë është detyrë e drejtorëve – për më tepër, veprim i domosdoshëm për ndërmarrjet. Katër ndërmarrjet kanë nisur proceset sipas ligjit dhe me transparencë të plotë, duke u bërë thirrje shoqërisë civile, mediave dhe Ambasadës Britanike që të vëzhgojnë dhe të ndihmojnë me mjetet e tyre. Por z. Hoti dhe eprorët e tij s’mund të jenë të kënaqur me një ecuri të këtillë; ata kërkojnë me ngulm që në pozita drejtuese të emërohen njerëzit e tyre dhe që vendimmarrja t’u shërbejë zhvatësve e oligarkëve.

Katër vendimet e djeshme, ashtu si përpjekjet që u paraprinë vendimeve, paraqesin ndërhyrje të rëndë të zotërinjve Hoti e Kuçi në punën e pavarur të bordeve. Ata kanë penguar vazhdimisht drejtorët të kryejnë detyrën e tyre. Kurse tani kanë marrë vendimet tinëzare që shkelin ligjin dhe rrezikojnë të ardhmen e ndërmarrjeve.

Kushtetuta e Republikës së Kosovës thotë se ndërmarrjet publike duhet të qeverisen në përputhje me interesin publik. Shteti i kapur nënkupton që vendimmarrja u shërben interesave të ngushta. Dhe kjo u vërtetua kur me Qeverinë Kurti gjetëm 17 ndërmarrje publike me humbje, buzë greminës së falimentimit dhe vetëm 3 ndërmarrje me bilanc financiar pozitiv. Kjo gjendje reale tregon se këto ndërmarrje ishin banka familjare te pushtetarëve dhe jo siç duhet të jenë shtyllë për zhvillim ekonomik të vendit.