Ibrahimi: Viti 2017 për TVM2 do të jetë i suksesshëm

Viti kalendarik ka përfunduar tashmë për TVM2 dhe servisi publik po punon fuqishëm për vitin 2017 dhe sfidat e mëdha që e presin gjatë tij. Një nga sfidat e para, por më e bukura për programin në gjuhën shqipe në televizionin pubik, është padyshim edhe fillimi i pritshëm i programit 24 orësh, përcjell Telegrafi Maqedoni.

Program i pandërprerë në gjuhën shqipe është pjesë e marrëveshjes politike por fillimi i tij u kushtëzua nga faktorë të tjerë, që nuk janë në dorë të TVM-së, thotë zëvëndës drejtori i përgjithshëm I RTM-së, Harun Ibrahimi.

Sipas tij, për program shtesë duhen edhe punësime dhe teknologji shtesë, por punësimet e reja u shtynë për shkak të zgjedhjeve të parakohëshme. Me rëndësi sipas Ibrahimit, është baza ligjore që tashmë ekziston.

“Tashmë kemi një bazë ligjore dhe ajo mundëson qe te kemi program 24 orësh dhe ajo është kryesorja për të gjithë ne në TVM, kjo patjetër duhet të realizohet sepse pas këtij ligji qëndrojnë subjektet më të mëdha në vend. Jam optimist se patjetër brenda këtij viti do të kemi 24 orë program në gjuhën shqipe në kuadër të RTM-së. Që të funksionojë duhet freskim dhe kuadro të reja qoftë gazetarë qoftë teknikë. Sipas parashikimeve tona, parashikohet punësimi i mbi 60 shqiptarëve brenda këtij viti. Kjo patjetër të bëhet që njëherë e përgjithnjë të zgjidhet problemi 2 TVM2. Pa kuadër dhe teknologji bahskëkohore, vështirë të kemi një program ashtu si i ka hije servisit publik”, tha Harun Ibrahimi, zv.drejtor gjeneral i RTVM-së.

Sipas zv.drejtorit të përgjithshëm të RTM-së ky vit do të jetë vit i sukseseve të mëdha, por sipas tij ju takon tani të punësuarve të punojnë për të arritur që servisi publik të jetë vërtetë servis në shërbim të qytetarëve./Telegrafi/