Hoxhë Labinot Maliqi: Politikbërësit në Kosovë të marrin mësim nga SHBA, të mos diskriminohen gratë më shamia

Imami i xhamisë “Prof. Dr. Bedri Kamberi” në Prishtinë, Labinot Maliqi, ka komentuar vizitën e krerëve të shtetit në SHBA dhe takimin me Sekretarin Blinken.

Maliqi ka vënë theksin te prania e një gruaje muslimane me shami në takim.

“Sekretari Amerikan Antony Blinken, ka mirëpritur delegacionin e Kosovës, Presidenten Vjosa Osmani si dhe Kryeministrin Albin Kurti, duke patur në tavolinën e tij zyrtare një grua muslimane e cila e bartë me krenari shaminë edhe gjatë këtij takimi dypalësh’.

Hoxha nga Prishtina ka thënë se edhe institucionet e Kosovës duhet të marrin shembull nga SHBA në trajtimin e grave të mbuluara.

“Shtetet e Bashkuara të Amerikës janë djepi i demokracisë, dhe si të tilla duhet të jenë shembull për politikbërësit në Kosovë edhe në fushën e Lirive Fetare, në mënyrë që vajzat dhe gratë të cilat e bartin shaminë mos të diskriminohen, bullizohen e përjashtohen më nga shkolla e puna”, ka shkruar Maliqi.

Ndryshe, sot ka pasur disa reagime nga hoxhallarë e personalitete tjera për fotografitë e takimit.

Sipas tyre institucionet qëllimisht kanë larguar gruan me shami nga fotografitë e takimit.

Në fotot zyrtare të publikuara nga Zyra e Kryeministrit, nuk është përfshirë foto e gruas me shami, derisa fotot e Departamentit të Shtetit dhe Zyrës së Presidentes përfshijnë edhe zyrtaren me shami.

Telegrafi është në pritje të ndonjë përgjigje nga Zyra e Kryeministrit në lidhje me publimin e fotove të këtij takimi./Telegrafi/

Met today with President Osmani and Prime Minister Kurti of Kosovo. The United States supports Kosovo’s Euro-Atlantic and international integration and the EU-facilitated Kosovo-Serbia Dialogue. We appreciate Kosovo’s hospitality to Afghans and its firm support for Ukraine. pic.twitter.com/cNIrY2EwwY

— Secretary Antony Blinken (@SecBlinken) July 26, 2022