Hoti i përgjigjet Selimit: Nuk i komentojmë vendimet e organeve të drejtësisë, në Qeveri nuk ka hapësirë për sjellje ndryshe

Kryeministri i Kosovës, Avdullah Hoti i është përgjigjur ministrit të Drejtësisë, Selim Selimi i cili kërkoi që të pezullohet dialogu me Serbinë dhe se duhet të kërkohet transparencë nga Dhomat e Specializuara.

Hoti në mbyllje të mbledhjes ka thënë se Qeveria e Kosovës nuk do të komentojë vendimet e organeve të drejtësisë dhe se ministri i Drejtësisë duhet ta dijë më së miri këtë çështje.

Hoti po ashtu theksoi se Kushtetuta e vendit është e qartë edhe për situatën kur vendi është pa president.

“Duhet të respektojmë të gjithë parimin e ndarjes së pushteteve. Nuk komentojmë vendimet e organeve të drejtësisë. E në veçanti besoj që ministri i Drejtësisë e ka të qartë më mirë se ne këtë çështje. Ne nuk ndërhyjmë edhe nuk komentojmë vendimet e organeve të Drejtësisë. Me lejoni të ju them qartë, drejt dhe hapur që në Qeverinë e Kosovës nuk ka hapësirë për sjellje ndryshe. Bazën ligjore e kemi të qartë si të sillemi për t’i ndihmuar ligjërisht personat që janë përfshirë në këtë situatë. Kushtetuta është e qartë si procedohet më tutje në situatën kur vendi nuk ka President. Puna e Qeverisë, dhe secili prej juve duhet të vazhdojë me intensitet të shtuar për shkak të situatës së rënduar”, tha Hoti.

Pas aktakuzave të konfirmuara tashmë për ish-presidenti, Hashim Thaçin, ish-kryetarët e Kuvendit, Kadri Veselin e Jakup Krasniqi, dhe shefi i grupit parlamentar të LVV-së, Rexhep Selimin është mbledhur Qeveria e Kosovës.

Lexo po ashtu Ministri i Drejtësisë Selimi kërkon të ndërpriten të gjitha aktivitetet që lidhen me Serbinë

Në këtë mbledhje ministrat e Qeverisë Hoti folën për këto aktakuza të Speciales.

Nga aty ministri i Drejtësisë, Selim Selimi tha se vendi po kalon në periudhë të vështirë dhe ngritja e aktakuzave është goditje për popullin.

“Qeveria e Kosovës duhet të pezullojë dialogun deri në një moment tjetër. Qeveria e Kosovës është për vendosjen e drejtësisë, por gjykata duhet qartë të sqarojë se është gjykatë e Kosovës e nuk operon me “prova” të Serbisë”, ka thënë ministri i Drejtësisë, Selim Selimi në mbledhjen e Qeverisë.

Ai tha se duhet ndërprerë të gjitha aktivitetet që lidhen me Serbinë.

“Duhet më shumë transparencë nga Dhomat e Specializuara për tërë procesin që po kalojnë ish- ushtarët e UÇK-së. Të gjithë jemi për drejtësi dhe asaj nuk i ikë askush”, ka shtuar ai. /Telegrafi/