Hoti kujton aksionin në veri: Ndjejmë obligim, por edhe motiv për funksionalizim të rendit kushtetues

Kryeministri i Kosovës, Avdullah Hoti ka kujtuar aksionin e Njësisë Speciale të Policisë së Kosovës në veri të vendit nëntë vjet më parë, ku ra heroikisht, Enver Zymberi.

Hoti përmes një statusi në rrjetin social në Facebook ka shkruar se Zymberi ra në kryerje të detyrës, si shembull i sakrificës e besnikërisë ndaj atdheut.

Kryeministri i vendit theksoi se ndjenë obligim, por edhe motiv për funksionalizim të plotë të rendit kushtetues, për një të ardhme ku sundon rendi dhe ligji.

“Sot bëhen 9 vite nga rënia heroike e Enver Zymberajt. Ai ra në kryerje të detyrës, si shembull i sakrificës e besnikërisë ndaj atdheut. Ai ra heroikisht që në Kosovë të sundon rendi dhe ligji. Në këtë përvjetor të rënies së tij, ndjejmë obligim, por edhe motiv të përbashkët për funksionalizim të plotë të rendit kushtetues, për një të ardhme ku sundon rendi dhe ligji”, ka shkruar Hoti në Facebook.

Ndryshe, sot bëhen nëntë vjet kur Njësia Speciale e Policisë së Kosovës (ROSU) kishte ndërmarrë aksionin për t’i futur nën kontroll pikat kufitare në veri të Kosovës, Jarinjë dhe Bërnjak. Në mëngjesin e 25 korrikut të vitit 2011, ROSU, ishte nisur drejt pikave kufitare në veri të Kosovës në përpjekje për t’i marrë nën kontroll ato. Por ROSU hasi në pengesat e serbëve në veri, ku gjatë këtij aksioni nga strukturat ilegale serbe ishte vrarë polici Enver Zymberi. /Telegrafi/