Holanda pritet të lehtësojë masat pavarësisht numrit rekord të infeksioneve të reja me COVID-19

Qeveria holandeze pritet të njoftojë më vonë sot se do të lejojë restorantet, baret dhe teatrot të rihapen, pavarësisht numrit rekord të infeksioneve me coronavirus.

Sipas medieve të huaja, përcjell Telegrafi, kryeministri Mark Rutte dhe ministri i Shëndetësisë, Ernst Kuipers pritet të shpallin rregullat e reja në një konferencë shtypi në orën 19:00.

Mbrëmë vonë, qeveria lëshoi këshillat zyrtare të ekspertëve shëndetësorë dhe zyrtarëve të pushtetit vendor, të cilët mbështesin përfundimin e një bllokimi të rreptë që ka hyrë në fuqi që nga mesi i dhjetorit.

Mediat theksojnë se pavarësisht infeksioneve rekord, ekspertët thanë se varianti Omicron i coronavirusit, i cili tani është mbizotërues në Holandë, “ka një pamje klinike më pak serioze” sesa varianti Delta, i cili shkaktoi një valë të mëparshme.

Ndërkohë studimet e huaja tregojnë se pranimet në spital me Omicron janë midis 40% dhe 60% më të ulëta, ndërsa pranimet në kujdesin intensiv janë përgjysmuar, thanë ata.

Këshilltarët e qeverisë thanë se baret, restorantet dhe teatrot duhet të lejohen të hapen deri në orën 22:00. /Telegrafi/