Holanda dënohet për sulmin me bombë në Afganistan

Një gjykatë lokale në Holandë ka vendosur se forcat holandeze bombarduan ilegalisht një kompleks banimi në Afganistan në vitin 2007 dhe urdhëruan shtetin të kompensojë viktimat financiarisht. Gjykata e Qarkut në Hagë konstatoi se sulmi, i cili u krye natën vonë dhe mori jetën e rreth 20 civilëve, ishte kryer në kundërshtim me ligjin ndërkombëtar.

Një padi civile për dëmshpërblim kundër shtetit holandez u ngrit nga katër të mbijetuar dhe gjykata vendosi në favor të tyre, raporton reuters.

Ministria holandeze e Mbrojtjes pretendoi se ndërtesat e prekura, të rrethuara me mure, po përdoreshin nga Talebanët në kohën kur u sulmuan, duke përdorur helikopterë sulmues dhe aeroplanë luftarakë F-16.

Në atë kohë, Holanda ishte pjesë e koalicionit ndërkombëtar të udhëhequr nga SHBA-ja që luftonte kundër Talebanëve në Afganistan.

Megjithatë, kishin kaluar 12 orë që kur Talebanët përdorën për herë të fundit vendin e sulmuar si një vend nga ku hapnin zjarr, dhe gjykatësit arritën në përfundimin se ushtria holandeze nuk kishte informacion të mjaftueshëm për të përcaktuar me siguri se kompleksi i apartamenteve ishte një objektiv ushtarak.

Në luftimet tre ditore të njohura si Beteja e Chora, 250 afganë vdiqën, mes tyre midis 50 dhe 80 civilë. Menjëherë para këtyre betejave, Talebanët kapën një numër stacionesh policie dhe përparuan në drejtim të një poste ushtarake holandeze.

Kjo është hera e parë që shteti holandez shpallet përgjegjës për veprimet ushtarake në Afganistan dhe hera e parë që një gjykatë e shpall shtetin përgjegjës për bombardimet.

Vendimi është i shkallës së parë dhe Ministria e Mbrojtjes e Holandës ka tre muaj kohë për të bërë ankesë. /Telegrafi/