Heqja e vijave të kuqe, analistët flasin për mundësinë e një koalicioni LDK-PDK

Lidhja Demokratike e Kosovës (LDK), ditë më parë ka bërë të ditur se i ka hequr vijat e kuqe ndaj Partisë Demokratike të Kosovës (PDK), ndërsa kjo është parë si mundësi që edhe PDK-ja të përfshihet në koalicion, edhe pse kryeministri Avdullah Hoti thotë se koalicioni aktual është stabil.

Por njohësit e çështjeve politike në vend vlerësojnë se kjo është një mundësi që PDK të përfshihet në Qeverinë Hoti, edhe pse sipas tyre zgjidhja më e mirë është të qëndroj në opozitë.

Analisti Imer Mushkolaj në një prononcim për Telegrafin ka thënë se PDK duhet të vendos të qëndroj në opozitë (si një opozitë e fortë) që në zgjedhjet e ardhshme të fitoj më shumë pikë.

Edhe pse siç tha ai gjithçka varet nga konfirmimi ose jo i aktakuzës së Kadri Veselit nga Gjykata Speciale.

Lexo po ashtu Mustafa tregon 'pse u hoqën vijat e kuqe ndaj PDK-së', flet për 'mini-shengenin', aktakuzat nga Specialja dhe Vjosa Osmanin

“Gjithçka varet nga konfirmimi ose jo i aktakuzës nga Gjykata Speciale të liderit të PDK-së, Kadri Veseli. PDK gjendet në një pozicion jo të lehtë, sepse nuk e dimë veprimin e Gjykatës Speciale. Nëse flasim nga aspekti politik për përfshirjen ose të jo të PDK-së në Qeverinë e kryeministrit Hoti, atëherë PDK duhet të vendos nëse dëshiron të qëndroj në opozitë, si një opozitë e fortë që në zgjedhjet e ardhshme të provoj të fitoj më shumë pikë”, ka thënë Mushkolaj.

Lexo po ashtu Hoti flet rreth përfshirjes së PDK-së në Qeveri, thotë se koalicioni është stabil dhe nuk ka arsye për kombinime tjera 

Ai po ashtu tha se nëse PDK pranon që të hyj në koalicion qeverisës, atëherë marrëveshja eventuale mund të jetë posti i presidentit.

“Nuk e kuptoj pse duhet të futet tash në qeveri, nëse nuk përfiton çka do qoftë. Dhe nëse mund të përfitoj, mund të jetë një marrëveshje eventuale për mundësinë që dikush nga PDK të zgjidhet president. Përndryshe do duhej të qëndronte në opozitë në mënyrë që ta kryente punën e vet si parti opozitare”, vlerësoi Mushkolaj.

Ndërsa, Albana Rexha nga Demokraci Plus (D+) ka vlerësuar se heqja e vijave të kuqe nga ana e liderit të LDK-së flet për dy aspekte të ndryshme duke përfshirë mënyrën e qeverisjes brenda partisë si dhe qëndrueshmërinë e koalicionit të tanishëm.

Lexo po ashtu Deliu-Kodra: PDK nuk ka vija të kuqe, por vullneti aktual i anëtarësisë është të qëndrojmë në opozitë

Sipas saj, vënia e vijave të kuqe me PDK-në ka ndodh me votim brenda organeve të partisë, por largimi i tyre është bërë nga vet lideri duke shpërfill procesin e vendimmarrjes brenda partisë.

“Vlerësoj se është shpërfill procesi i vendimmarrjes dhe organet e brendshme të partisë të cilat janë kruciale për demokracinë e brendshme në parti. Këto veprime shpërfaqin edhe tendenca autoritative për udhëheqje të partisë dhe minojnë mendimin ndryshe”, ka thënë Rexha.

Ajo po ashtu theksoi se heqja e vijave të kuqe ndaj PDK-së mund të vlerësohet si ftesë indirekte që të bashkohet në koalicion.

“Gjithsesi, vlerësoj se ky aspekt mbetet të shihet për dallim nga aspekti i parë i cili qartë shpërfaq mos-respektim të vendimmarrjes brenda partisë”, ka thënë ndër të tjera Rexha.

Ndryshe, LDK ditë më parë ka hequr të gjitha vijat e kuqe për PDK-në. I pari i Lidhjes Demokratike të Kosovës, Isa Mustafa, kishte thënë se vijat e kuqe ndaj PDK-së u hoqën për shkak të vështirësive për të bërë zgjidhje. /Telegrafi/