Haziri: Kosova të mos bie në hendekun e Serbisë

Nënkryetari i Lidhjes Demokratike të Kosovës (LDK), Lutfi Haziri, ka deklaruar se Serbia nuk përbën më një kërcënim për Kosovën, duke theksuar se KFOR-i dhe NATO-ja janë të mandatuara për të mbrojtur vendin.

Haziri kërcënimet serbe i quajti si një “luftë hibride” nga Serbia, por theksoi se përpjekjet e saj për të krijuar krizë në Kosovë kanë dështuar.

“Asgjë e re prej shpalljes së Pavarësisë. Kjo është luftë hibride që ka qenë potencial për shkaktim krizash deri në kërcënim me luftë. Dallimi është se asnjëherë nuk ka gjetur hapësirë në Kosovë që të shkakton këtë frikë se fundja Serbia nuk mund ta kërcënojë Kosovën në këtë rast, por KFOR/NATO. Ata kanë mandat ushtarak në tokë dhe ajër të Kosovës. Ata e dinë këtë e le ta provojnë. Po ashtu, Kosova është e rrethuar me 3 shtete anëtare të NATO-s”, ka shkruar Haziri, në një postim në Facebook, transmeton Telegrafi.

Nënkryetari i LDK-së, thotë se Serbia e ka humbur luftën edhe prej Kosovës.

“Ne, me rezistencë politike dhe kryengritje ushtarake, e kemi fituar luftën për herë të parë në histori dhe kemi demontuar okupimin jugosllav e serb më 12 qershor 1999. Ata mund ta harrojnë ndihmën e NATO-s për Kosovës, por nuk po pajtohen me fitoren politike, ushtarake e diplomatike të Kosovës. Serbia mund të jetë vend fqinj i Kosovës dhe asgjë më shumë. Nuk mundet as të na kërcënojë se s’ka kush i frikësohet”, ka shkruar Haziri.

Haziri kritikoi Qeverinë e Kurtit, duke e akuzuar për një politikë të gabuar populiste që, sipas tij, po izolon Kosovën nga aleatët e saj ndërkombëtarë dhe nga fqinjët, përfshirë Shqipërinë.

Ai e cilësoi qeverisjen aktuale si një pengesë në raportet e Kosovës me NATO-n dhe shtetet perëndimore, ndërsa përmendi se Serbia, me politikën e saj të kushtëzimeve, ka dështuar historikisht.

“E mira e Kosovës është mos të bie në hendekun e Serbisë. Kjo Qeveri, e cila me veprimet e saja populliste e për konsum politik, po luan me sentimentin tonë. Politikë shumë e gabuar që po na izolon nga miqtë e fqinjët që janë në NATO edhe nga vetë shteti shqiptar”.

“Vuçiq e di që as Aleksandri i parë i Serbisë më 1920, as Aleksandri i dytë më 1956 dhe as ky i treti nuk mund ta mbajnë Serbinë në Kosovë si okupatore. Republika e Kosovës është kompromisi më i madh i shqiptarëve dhe zgjidhja më e mirë për të gjithë ata që jetojnë në Kosovë. Thjeshtë, do ta ketë fatin e atyre dy të parëve”, ka shtuar Haziri.

“Vuçiq përfaqëson politikën e kushtëzimeve dhe marrëdhëniet e kushtëzuara tash e 35 vite të Serbisë, si mjeti i vetëm politik që ka. Ata janë mësuar me marrëdhënie të tilla me sanksione ekonomike, financiare, kufizime e deri në luftëra. Edhe ky kushtëzim s’i kalon, por arsyetimi i tij po gjen solidaritet fatkeqësisht, për shkak të dështimeve në qeverinë Kurti”, ka shkruar Haziri. /Telegrafi/