Grupi i pakënaqur në BDI me letër për Ali Ahmetin, kërkojnë të gjejë zgjidhje për pakënaqësitë brendapartiake

Disa zyrtarë të BDI-së i kanë dërguar letër kryetarit të kësaj partie Ali Ahmeti, duke shprehur pakënaqësi brenda partiake.

I ashtuquajturi “grupi i zjarrit” në komunikatë kërkojnë që kryetari i partisë të gjegjë zgjidhje për unitetin partiak.

Siç thonë ata në kumtesë, kanë konstatuar parregullsi brendapartiake, të cilat siç thonë, shkaktojnë pakënaqësi te votuesit.

Më poshtë e keni reagimin e plotë të zyrtarëve të BDI-së:

Duke patur parasysh gjendjen e krijuar organizative për brenda BDI-së gjatë një periudhë dyvjeçare, jemi të detyruar të ngremë zërin dhe të reagojmë që atë të cilën e kemi krijuar me mish e me shpirt, pra Bashkimin Demokratik për Integrim, ta kthejme në pozitën siç zhvillohej plot 18 vite- pra mirë të organizuar dhe mirë të strukturuar.

Bashkimi Demokratik për Integrim nuk është thjeshtë një parti politike, por BDI është vlerë, e cila 18 vite ka ruajtur dhe ka avancuar të drejtat e shqiptarëve, një familje e hapur dhe me konsultime brenda për brenda, pa privilegje individuale, me organe statutare dhe me rritje të vazhdueshme të trupit elektoral. Si të tillë duhet patjetër ta kthejmë aty ku e ka vendin.

Ne konstatojmë:

-Në BDI gati për dy vite nuk ekzistojnë dhe nuk themelohen organet statutare partiake! -Si pasojë e kësaj, vendimmarrja politike është bërë pronë individuale! -Nuk ka debat dhe konsultime me bazat partiake! -Zgjedhjet kadrovike janë shndërruar në privilegje të individit Artan Grubi!

-Nuk ka llogaridhënie për punën e Qeverisë dhe programin politik për gati dy vite!

-Për shkak të mosfunksionimit të jetës organizative të Bashkimit Demokratik për Integrim, ne konstatojmë se ka rënie të mbështetjes për partinë (zgjedhjet e fundit në Tetovë)!

-Sjellja arrogante dhe diletante e ekzekutivit në krye me Artan Grubin, kanë shkaktuar pakënaqësi, revoltë dhe pasivitet të strukturave dhe të votuesve!

Koncentrimi i pushtetit politik, programor e kadrovik tek individi dhe përjashtimi i strukturave meritore nga vendimmarrja politike dhe tendenca për tjetërsimin e BDI-së, ka shkaktuar revoltë tek anëtarësia më meritore për fitoret e BDI-së ne të kaluaren.

Pikerisht për keto arsye kërkojmë:

-Debat politik brenda partisë për tejkalimin e kësaj situate; -Pergjegjësi dhe llogaridhënie nga mbajtësit e pushtetit ekzekutiv; -Apelojmë që të ndërpritet “lufta” politike brenda llojit;

I bëjmë thirrje anëtarësisë dhe strukturave partiake që të angazhohen në evitimin dhe tejkalimin e këtyre dukurive dhe të kesaj situate;

-Kërkojmë nga kryetari i BDI-së, Ali Ahmeti që të shfrytëzojë autoritetin e vet politik dhe statutar për gjetjen e një zgjidhje për ruajtjen e unitetit partiak.