Gratë e UÇK-së në qendër të ekspozitës në Prizren

Për të nderuar kujtimin për gratë që kontribuuan për lirinë e Kosovës, në ndërtesën e Komunës së Prizrenit është hapur ekspozita “Gratë në rrugën e lirisë”, bashkë me promovimin e katalogut me të njëjtin emër.

Në këtë aktivitet të realizuar për nder të Festës së Flamurit përmes fotografive janë prezantuar momentet dhe kujtimet e rolit të rëndësishëm që gratë kanë luajtur në luftën çlirimtare, raporton Telegrafi.

Me këtë rast është theksuar se katalogu dhe ekspozita përbëjnë një përpjekje për të rikthyer në fokus historinë dhe sakrificën e shumë grave dhe vajzave që ishin pjesëmarrëse në betejat e ndryshme të UÇK-së në vitet 1998-1999.

“Kjo është dita kur i japim nderin dhe respektin e merituar  grave të UÇK-së, heroinave të luftës, që luftuan për një Kosovë të lirë dhe të drejtë”, ka thënë ish-luftëtarja, Ramize Sinanaj-Shala.

Gjenerali shqiptar, Kudusi Lame ka shprehur mirënjohje për të gjitha gratë që kanë kontribuar në luftën e UÇK-së.

Ndërkaq kryetari, Shaqir Totaj ka apeluar për përmirësimin e pozitës së grave në shoqëri, raporton Telegrafi.

“Ndërtimi i shtetit tonë, institucioneve demokratike kërkon trajtimin e pozitës së grave në shoqëri. Prandaj apeloj për kujdes të veçantë në këtë drejtim”, ka thënë ai.

Pjesëmarrësit, mes të cilëve kanë qenë përfaqësues të institucioneve, familjeve të dëshmorëve, organizatave të dala nga lufta, veteranëve të UÇK-së dhe qytetarë, kanë pasur mundësi që të shohin fotografi dhe materiale që dokumentojnë sakrificat dhe angazhimin e grave të UÇK-së në rrugën e lirisë. /Telegrafi/