Gjeorgjia zgjedh për president kritikun e Perëndimit

Ligjvënësit gjeorgjianë zgjodhën Mikheil Kavelashvili, kritikun e ashpër të Perëndimit, si presidentin e ri të vendit të shtunën, duke e vendosur atë si pasues të një paraardhësi pro-perëndimor mes protestave të mëdha kundër qeverisë për ndërprerjen e bisedimeve për anëtarësimin e vendit në Bashkimin Evropian.

Lëvizja e partisë në pushtet, “Ëndrra Gjeorgjiane”, për të ngrirë procesin e anëtarësimit në BE deri në vitin 2028, duke ndalur papritur një objektiv kombëtar afatgjatë të shkruar në kushtetutën e vendit, ka shkaktuar zemërim të gjerë në Gjeorgji, ku sondazhet e opinionit tregojnë se kërkimi i anëtarësimit në BE është jashtëzakonisht popullor.

Kavelashvili, ish-lojtar profesionist i futbollit, ka pikëpamje fort anti-perëndimore, shpeshherë konspirative. Në fjalimet publike këtë vit, ai ka pohuar vazhdimisht se agjencitë perëndimore të inteligjencës po përpiqen ta fusin Gjeorgjinë në luftë me Rusinë, shkruan france24.

Presidentët gjeorgjianë zgjidhen nga një kolegj elektorësh i përbërë nga deputetë dhe përfaqësues të qeverisjes vendore. Nga 225 zgjedhësh të pranishëm, 224 votuan për Kavelashvilin, i cili ishte i vetmi kandidat i nominuar.

Të gjitha partitë opozitare kanë bojkotuar parlamentin që nga zgjedhjet e muajit tetor, ku rezultatet zyrtare i dhanë partisë në pushtet, “Ëndrra Gjeorgjiane”, pothuajse 54 për qind të votave, por që opozita i konsideron të manipuluara.

Ndryshe, qindra protestues u mblodhën jashtë parlamentit para votimit për presidentin duke kundërshtuar zgjedhjen e 53-vjeçarit si president në Gjeorgji. /Telegrafi/