Presidenti i organit qeverisës të futbollit botëror (FIFA), Gianni Infantino, është i neveritur nga incidenti që ndodhi në ndeshjen e ekipit nën 12 vjeç në Sao Paulo të Brazilit.
Incidenti ndodhi më 19 tetor kur një djalë 11-vjeçar nga klubi AD Manthiqueira u ofendua në mënyrë raciste në një ndeshje. Ai u ofendua nga një tifoz dhe ofendimet nuk ishin vetëm raciste, por lidheshin edhe me familjen e tij.
Sipas mediumit brazilian Globo, djaloshi raportoi se ishte abuzuar në baza raciste dhe ishte quajtur “i zi”, “pa familje” dhe “bir kurve”.
Pas fyerjeve, djali u ul në fushë dhe qau. Shokët e tij të ekipit dhe gjyqtari u përpoqën ta ngushëllonin, por nuk patën sukses. Djali që qante nuk mundi të qetësohej, shkoi në dhomën e zhveshjes dhe nuk u kthye në lojë për shkak të "shqetësimit emocional".
Pak çaste më vonë, gjyqtari Guilherme Drbochlaë aktivizoi protokollin anti-racizëm dhe policia ushtarake mbërriti në fushë dhe reagoi.
Njeriu i parë në futbollin botëror, Gianni Infantino, foli për gjithçka, duke thënë se ishte i neveritur nga ky incident.
“Jam i tmerruar nga lajmi se një lojtar 12-vjeçar nga Academia Desportiva Manthiqueira iu nënshtrua abuzimit racist nga tifozët gjatë një ndeshjeje të Campeonato Paulista U-12 kundër Corinthians në Sao Paulo”, ka shkruar fillimisht Infantino në Instagram.
Ai theksoi se FIFA do të bëjë gjithçka që mundet për të luftuar racizmin në arenat sportive.
"Do të vazhdoj të jem shumë i qartë për këtë çështje: racizmi dhe diskriminimi nuk janë thjesht gabime - ato janë krime. Të gjitha incidentet e racizmit, qofshin në stadiume apo online, duhet të ndëshkohen siç duhet si nga futbolli ashtu edhe nga shoqëria në tërësi", përfundoi presidenti i FIFA-s. /Telegrafi/
