Gastronomët ankohen se masat e reja po ua rëndojnë gjendjen edhe më shumë

Pas shtimit të rasteve me COVID-19 ditëve të fundit, Qeveria e Kosovës mori vendim që nga sot të gjitha shërbime e gastronomisë, përfshirë restorantet, kafiteritë, klubet e natës të mos ofrojnë shërbime nga ora 21:00 deri në 05:00 në të gjithë territorin e vendit tonë.

Jashtë këtij orari mund të punojnë vetëm në hapësira të hapura duke respektuar distancën sociale 1.5 metra hapësirë ndërmjet tavolinave, si dhe shërbimet take-away (merre me vete).

Një vendim i tillë duket një barrë e rëndë për këtë sektor. Nënkryetari i Shoqatës së Gastronomeve të Kosovës, Fatos Mexhuani për KosovaPress thotë se për vendime të tilla ata nuk janë konsultuar nga institucionet përgjegjëse.

Sipas tij këto vendime të djeshme për sektorin e gastronomisë kanë shkaktuar edhe paqartësi.

Mexhuani thotë se në këtë periudhë është e nevojshme ndihma e shtetit për pronarët e restoranteve, kafiterive dhe klubeve të natës.

“Kjo është një prej brengave tona. Ne nuk jemi njoftuar paraprakisht për vendimin, nuk jemi konsultuar për orarin për komunat që janë mbyllur dhe nuk do ketë lëvizje të njerëzve. Kemi paqartësi pasi që nuk specifikohet vetëm për ato komunat që janë mbyllur apo që nuk janë mbyllur… Ne si gastronomi ishim të dëmtuar jo vetëm në Kosovë, por në të gjitha vendet e botës… Ne kemi qenë shumë të goditur. Tani na është rënduar edhe më shumë periudha e mbylljes. Nuk e di si do t’ia dalim pa ndihmën e shtetit kur e dimë që ende një pjesë e madhe e kompanive nuk kanë marrë pagë. Po ashtu, për qira nuk kemi ndonjë informatë se 50 përqindëshi i qirave a janë përfunduar për qiradhënësit”, tha ai.

Mexhuani madje ka thënë se krahas pakos së parë emergjente e nevojshme është edhe një pako e veçantë në mbështetje të këtij sektori.

“Më shumë se kurrë kemi nevojë për një ndihmë për të dalë nga kjo situatë. Ne kishin një pako në herën e parë dhe nuk iu përmbajtën asaj pakoje. Kjo na ka dëmtuar edhe më shumë për arsye se kemi pasur problem edhe me punëtorë dhe qiradhënie. Pakoja duhet të bëhet, por duhet ta respektojmë që të dalim nga kjo situatë është e nevojshme, dhe sa me parë duhet të takohemi dhe të shohim si të lëvizim përpara, pasi që kemi humbje të vendeve të punës, do të rriten kreditë e këqija”, tha Mexhuani.

Ndonëse në kafiteri shihet një numër i madh i qytetarëve që nuk respektojnë masat antiCOVID-19, nënkryetari i Shoqatës së Gastronomëve kërkon të bëhen më shumë inspektime dhe të gjobiten shkelësit e rekomandimeve të IKSHPK-së.

“Ne nuk mund ta luajmë policinë. Ftoj shtetin që nga sot të bëhen sa më shumë inspektime. Po ashtu, rekomandoj të vihet gjoba te qytetarët për arsye se ne si pronarë dhe si biznese nuk mund t’i vetëdijesojmë qytetarët për mbajtje të distancë dhe mbajtje të maskave”, deklaroi Mexhuani.

Numri i rasteve pozitive në Kosovë që nga shpërthimi i pandemisë më 13 mars e deri më tash është 3508 , prej tyre janë shëruar 1902, 75 kanë vdekur dhe raste aktive vazhdojnë të jenë edhe 1531. /Telegrafi/