Fituesja e çmimit ‘Oscar’, aktorja Kathy Bates humbi 45 kilogramë në gjashtë vjet: Nuk kam qenë kaq i dobët që nga universiteti

Aktorja amerikane dhe fituesja e çmimit “Oscar”, Kathy Bates (76 vjeçe), ka bërë një paraqitje mbresëlënëse në ndarjen e çmimeve “Emmy Awards”, duke e mahnitur publikun me linjën e saj të re trupore.

Në vitet e fundit, Kathy ka punuar shumë për të përmirësuar formën e saj fizike. Në një intervistë për Variety, ajo diskutoi rolin e saj si Madeline Matlock në serialin televiziv “Matlock”, duke thënë se qëndrueshmëria që kërkohej për këtë rol ishte sfida më e madhe për të. Ajo zbuloi se humbja e peshës ka ndihmuar shumë në këtë drejtim.

“Ka qenë jashtëzakonisht ndihmuese që kam humbur 45 kilogramë gjatë gjashtë ose shtatë viteve të fundit. Mendoj se nuk kam qenë kaq e dobët që nga koha kur kam qenë në fakultet”, tha ajo.

Kur në vitin 2011 luante në serialin “Devil’s Advocate” (Harry’s Law), Kathy ishte më e shëndoshë se kurrë më parë.

“Ishte e nevojshme të ulesha sa herë që kisha mundësi. Kisha vështirësi në të ecur. Jam e turpëruar që kam lejuar veten të humbas formën time, por tani kam një sasi të madhe energjie”, shtoi ajo.

Karriera e Kathy Bates ka zgjatur më shumë se gjashtë dekada. Ajo ka marrë çmime të shumta, përfshirë çmimet “Emmy Awards”, “Golden Globe” dhe “Oscar”, të cilin e fitoi për rolin e Annie Wilkes në filmin e zhanrit thriller “Misery” në vitin 1990. Ajo është nominuar gjithashtu për çmimet Tony dhe BAFTA.

Në një intervistë të fundit për New York Times, Kathy konfirmoi se do të largohet në pension pas projektit të saj të fundit, serialit televiziv “Matlock”. Ajo kishte dëshiruar të largohej nga bota e aktrimit më herët. Pas një roli në një film, të cilin nuk e identifikoi, ajo kishte planifikuar të tërhiqej dhe u kishte thënë agjentëve të saj se do të largohej në pension.

Megjithatë, ata i dërguan një skenar për “Matlock”, rifillimin e serialit të njohur ligjor që u transmetua nga viti 1986 deri në vitin 1992. Ndryshe nga seriali origjinal, ku protagonist ishte avokati Ben Matlock, i luajtur nga Andy Griffith. Seriali është krijuar nga Jennie Snyder Urman, krijuesja e serialit “Jane the Virgin”. /Telegrafi/