“I fiksuar pas posedimit”, dy formacionet se si do të luajë dhe do të rreshtohet Barcelona e Xavit

Mesfushori legjendar, Xavi Hernandez pritet të zëvendësojë Ronald Koemanin e larguar si trajner dhe do të rikthejë ‘rrugën e Barcelonës’ në Camp Nou.

Barcelona shkarkoi Koemanin të mërkurën mbrëma, ndërsa gjatë të enjtes emëroi Sergi Barjuan si trajner të përkohshëm nga Barcelona B.

Megjithatë, çdo medium dhe raportim thotë se Xavi ka pranuar detyrën e trajnerit të Barcelonës dhe zyrtarizimi i tij është vetëm çështje kohësh.

Edhe para se Xavi të mbaronte së luajturi për Barcelonën, ishte një sekret i pashprehur që ai do të kthehej.

Lexo po ashtu Xavi arrin marrëveshje me Barcelonën, zyrtarizimi çështje orësh

Xavi kaloi 25 vjet te Barcelona dhe u largua në moshën 35-vjeçare, pasi fitoi tripletën në vitin 2015, por ishte një ‘mirupafshim’ dhe jo një ‘lamtumirë’.

Me rikthimin e Xavit natyrshëm kanë filluar edhe pyetjet se si do të luajë dhe cilat do të jenë idetë e tij mbi lojën me klubin nga Camp Nou.

Mediumi Goal.com ka dhënë dy versione se si Xavi do të mund ta rreshtoj ekipin, pasi edhe njihet si ithtar i madh i posedimit të topit.

Lexo po ashtu Cazorla gëzon tifozët e Barcelonës, tregon punën dhe idetë e Xavit

Si do të rreshtohej Barcelona nën drejtimin e Xavit?

Nëse Xavi i përmbahet sistemit 4-3-3 siç preferon Laporta, ai do luante me dyshen Eric Garcia-Ronald Araujo në qendër të mbrojtjes. Garcia mund të rritet dhe të luajë rehat në zonat e mesfushës, ndërsa Araujo ka shpejtësinë për t’u rikthyer dhe për të ndaluar kundërsulmet.

Trajneri do të kërkojë gjerësinë, me Ousmane Dembele dhe Ansu Fati që do të luanin nga krahët pasi të dy të jenë në formë, ndërsa Sergio Aguero do luante ne qendër.

Në këtë formacion do të kishte vend edhe për veteranët Sergio Busquets dhe Jordi Alba, si dhe dy të talentuarit Frenkie de Jong dhe Pedri.

Nëse Xavi do të zgjedh një renditje 3-4-3, kjo do t’i japë Barcelonës mundësinë për të përdorur dy çifte mesfushe, me Busquets dhe De Jong njërën, si dhe Pedri dhe Gavi tjetrën, por më të avancuar.

Në këtë renditje, Dest do të luante në krahët e sulmit, teksa vend do të kishte edhe për Oscar Minguezan.

Befasia është se kapiteni Gerard Pique nuk shihet në asnjërin nga formacionet e mundshme të Xavit. /Telegrafi/