Federata e Sindikatave të Shëndetësisë: Dorëheqja e Gjocajt akt moral

Federata e Sindikatave të Shëndetësisë së Kosovës është njoftuar në lidhje me zhvillimet e fundit në SHSKUK, respektivisht me dorëheqjen e parevokueshme të drejtorit të SHSKUK-së Curr Gjocaj.

“Gjocaj gjatë mandatit të tij tre vjeçar është përballur me sfida dhe problematika të grumbulluar dhe çështje të pazgjidhura në QKUK dhe të gjitha njësive përbërëse të SHSKUK-së, gjatë gjithë kësaj kohe ka treguar një gatishmëri të jashtëzakonshme për punë me qëllim të vetëm, përmirësimin e shërbimeve shëndetësore, duke përfshirë përmirësimin e infrastrukturës, ngritjen e cilësisë së shërbimeve shëndetësore, përmirësimin e kushteve të punës të punëtorëve shëndetësor, në bazë të kompetencave dhe kushteve buxhetore të parapara për këtë institucion”, thuhet në reagimin e FSSHK-së.

Në komunikatë tutje thuhet se dorëheqja e tij si akt moral tregon qartë se Gjocaj ka qenë dhe është një njeri e mbi të gjitha profesionist parimor, i cili në rend të parë ka zbatimin e drejtë të ligjeve dhe akteve të tjera, të cilat janë në interes të reformës së sistemit shëndetësor e jo interesin e tij personal.

“Gjocaj është shembull i një menaxheri i cili bashkëpunon, pyet, delegon punë në interes të përgjithshëm të mbarëvajtjes së punës me qëllimin kryesor ofrimin cilësor të shërbimeve shëndetësore për shfrytëzuesit e shërbimeve shëndetësore në QKUK dhe njësive përbërëse të SHSKUK-së”, thuhet në komunikatë.

FSSHK respekton vendimin personal të Gjocajt,  por megjithatë sfidat nuk përfundojnë me dorëheqje apo akte morale, e kjo duhet të shërbejë për të tjerët që më në fund mos ta shikojnë interesin individual por interesin e gjithmbarshëm.

FSSHK shpreson se ministri i Shëndetësisë i dhe tashmë Bordi i ri Drejtues t’i merr në konsideratë të gjitha problemet në shëndetësi dhe përfundimisht shëndetësia ta merr rrugën e drejtë.

FSSHK do të jetë gjithmonë bashkëpunuese në të gjitha instancat me qëllim të përmirësimit të gjendjes në shëndetësi dhe punëtorëve shëndetësor. /Telegrafi/