Eliminim i hershëm i boksierëve kosovarë në Evropian

Boksierët kosovarë kanë vazhduar me eliminime të hershme në garat e nivelit të lartë ndërkombëtar.

Edmond Zefi e Ardit Delijaj të dielën janë eliminuar qysh në sfidat e tyre të para në Kampionatin Evropian për të Rinj që po mbahet në Kolobrzeg të Polonisë, shkruan sot Koha Ditore.

Edmond Zefi, që bokson në kategorinë deri 60 kilogramë, pësoi me vendim unanim nga hungarezi Richard Kovacs. Të tre anëtarët e jurisë vlerësuan luftën 30:27 në favor të hungarezit Kovacs.

Njëjtë u eliminua edhe Ardit Delijaj, në sfidën e kategorisë deri 81 kilogramë. Ai pësoi nga rumuni Antonio Dan Dinca pas tri raundeve.

Trajneri Burhan Xhafa është ankuar për padrejtësi të mëdha në të dy meçet.
"Ka pasur padrejtësi të mëdha në të dy meçet. Dhe me një fjalë shtetet proruse do të shkojnë shumica në finale. Është problem që shteti ynë pa përkrahje të ecë para. Shihet se rreth 80 për qind të referëve të Evropës janë prorusë. Ka padrejtësi të mëdha. Është bërë njëjtë si në garën e këngës Eurovision", ka thënë trajneri Burhan Xhafa për gazetën. Ai ishte me dy boksierët në Kolobrzeg të Polonisë.