Edhe Sneijder në planet e kinezëve

Një tjetër futbollist cilësor duket se po joshet nga milionat që ka nisur të shpenzojë pa kriter liga kineze dhe mund t’i bashkohet eksodit të lojtarëve që po preferojnë Azinë.

E ardhmja e Wesley Sneijder mund të jetë larg skuadrës së Galatasarayt, pasi mesfushori që ishte pjesë e ‘tripletës’ fituese të Interit në 2010, është në bisedime me dy skuadra kineze të cilat e kërkojnë që këtë muaj.

Ai që konfirmoi interesimin ndaj holandezit, ishte agjenti Guido Albers, i cili e la të hapur mundësinë e ndryshimit të fanellës në afatin dimëror.

Lexo po ashtu Drejtori sportiv i Galatasarayt nuk e mohon kalimin e Snajderit te Milani

“Janë dy klube që e kërkojnë me ngulm, por Sneijder ka një kontratë të vlefshme me Galatasarayn dhe për më tepër nuk i kanë bërë një propozim konkret lojtarit. Dy skuadrat në fjalë kanë informuar klubin turk, por ende nuk ka detaje”, ka deklaruar përfaqësuesi i Sneijder, transmeton TCH, me një referim të qartë se nëse do të vijnë miliona si në rastin e Carlos Tevez apo Oscar, edhe holandezi do të kthehet në një markë kineze.

“Çdo skuadër mund ta blejë Wesley Sneijderin për 7.5 milionë euro dhe këtë shifër e thotë kontrata e tij. Ai është i lumtur me Galatasarayn dhe i pëlqen jeta në Stamboll, e për këtë nuk ka asnjë nxitim për t’u larguar”, është shprehur agjenti i Sneijder.