Edgar Çani ishte titullar në barazimin e Pisas

Edgar Cani është aktivizuar për herë të parë si titullar me Pisan në Serie B për sezonin 2016/2017.

Sulmuesi shtatlartë, i cili kërkon të ringrihet pas disa sezoneve zhgënjyese me skuadra të ndryshme nga Italia në Angli, u preferua nga minuta e parë nga trajneri Gennaro Gattuso në sfidën ndaj Virtus Entellan në udhëtim, takim që përfundoi me rrjeta të paprekura.

Ai ishte gjatë gjithë kohës në udhëheqje të sulmit të toskanëve, por pa mundur të shënojë për skuadrën e tij, transmeton SuperSport.

Në dy takimet e para me Novaran dhe Ternanan, 27-vjeçari u aktivizua në pjesën e dytë nga Gattuso, ndërsa forma e mirë që kishte shfaqur në stërvitje e shtyu ish-futbollistin e Milanit ta hidhte në fushë titullar.

Gjithsesi në minutën e 76-të, shqiptari u zëvendësua, por sërish rrjetat mbeten të paprekura.

Pas tri javëve të para të Serie B, Pisa renditet në mesin e tabelës pikërisht në vendin e 12-të me katër pikë nga nëntë të mundshme.

Në të njëjtën kuotë pikësh është edhe Bari i Migjen Bashës, me mesfushorin kuqezi që është aktivizuar vetëm në humbjen 1-2 ndaj Cittadellas.