E quajti Kosovën “lider në Ballkan”, mediat serbe e quajnë skandaloze deklaratën e ministrit shqiptar në Mal të Zi

Mehmed Zenka, ministër për të Drejtat e Njeriut dhe të Pakicave në Qeverinë e Malit të Zi, deklaroi në Ulqin se Evropa në superlative po flet për Malin e Zi, por sipas tij, “Kosova, është një lider në Ballkan në respektimin e të drejtave të pakicave”.

“Nëse duam të shkojmë në Evropë, atëherë duhet të dëgjojmë se çfarë mendon Europa për ne dhe kjo është se ne jemi shumë më përpara të gjitha vendeve të Ballkanit, sipas të gjitha kritereve. Por ka një të vërtetë, kemi një shtet të Kosovës, ku pakicat kanë më shumë të drejta sesa në Mal të Zi”, citohet të ketë thënë Zenka, nga mediat serbe, përcjell Telegrafi.

Kështu, një deklaratë të tillë, një media serbe e kanë quajtur skandaloze.

Megjithatë, sipas mediave serbe, Zenka, gjatë hapjes së një shkolle të studimeve politike në atë qytet bregdetar, nuk është ndalur me kaq.

“Kosova ka një minus të vetëm dhe bëhet fjalë për faktin se malazezët nuk kanë një kategori kushtetuese”, ka thënë tutje Zenka.

Dhe sipas vlerësimit të tij, thuhet tutje, “ky nuk është faji i politikanëve kosovarë, por i politikës serbomadhe”. /Telegrafi/