E duan të gjitha skuadrat e mëdha angleze, por Dortmund nuk e ka në plan shitjen e Bellingham

Jude Bellingham po lidhet me një rikthim të mundshëm në Angli, vetëm pas një viti të kaluar te Borussia Dortmund.

Gjgianti gjerman kishte shpenzuar 23 milionë euro për transferimin e talentit anglez në verën e vitit 2020 nga Birmingham City.

Por paraqitjet e tij të jashtëzakonshme me verdhezinjtë kanë bërë që të gjitha skuadrat e mëdha angleze, si Liverpool, Chelsea, Manchester United, Arsenal e Manchester City të vihen pas tij.

Lajmet e fundit ishin se The Reds do të bënin një ofertë prej 95 milionë euro për transferimin e lojtarit të talentuar në Anfield.

Por mediumi 90min, ka raportuar se Dortmund nuk e ka ndërmend të shes yllin e tyre të ri në vitin 2022.

Verdhezinjtë janë të gatshëm t’i përballojnë çdo oferte vetëm e vetëm që të mbajnë së paku deri në vitin 2023 lojtarin në Signal Iduna Park.

Synimi i skuadrës gjermane është që Bellingham të vazhdojë të rritet dhe në fund ta shesin për një shumë mbi 130 milionë euro.

18-vjeçari në pesë ndeshjet e para këtë edicion me Dortmundin, ka shënuar një gol dhe ka asistuar në tre të tjerë. /Telegrafi/