Dy të vdekur dhe të tjerë të lënduar pasi një veturë me emigrantë goditi një pemë dhe u përmbys – pamje të aksidentit në Hungari

Dy persona humbën jetën dhe gjashtë janë lënduar në një aksident automobilistik në Hungari herët të enjten, pasi një automjet i dyshuar për transportin e emigrantëve që hynin ilegalisht në vend goditi një pemë dhe u përmbys.

Sipas mediave të huaja, përcjell Telegrafi, aksidenti ka ndodhur rreth orës 03:00 afër Kiskunmajsa, në jug të Hungarisë pranë kufirit me Serbinë.

Policia tha se drejtuesi i mjetit, një Renault me targa franceze, u largua me shpejtësi pasi policia tentoi të ndalonte trafikun dhe humbi kontrollin në një kthesë në rrugë.

Teksa iu shmang policisë, makina goditi një pemë dhe më pas u përmbys, tha policia.

Jozsef Hangai, një zëdhënës i Shërbimit Kombëtar të Ambulancës Hungareze, tha se dy nga ata që ndodheshin në automjet vdiqën në vendngjarje, ndërsa gjashtë të lënduar u dërguan në spitalet lokale për trajtim.

Policia tha se informacionet fillestare sugjeronin se automjeti drejtohej nga një kontrabandist që po transportonte emigrantët.

Hungaria ka mbajtur një qëndrim të ashpër kundër imigracionit të paligjshëm dhe në vitin 2015 ngriti një gardh kufitar prej 320 kilometrash përgjatë kufijve të saj me Serbinë dhe Kroacinë për të shmangur qindra mijëra emigrantë që përpiqeshin të hynin në Bashkimin Evropian përgjatë asaj që quhet rruga ballkanike.

Megjithatë, fqinji i Hungarisë në veri, Sllovakia, filloi të kryejë kontrolle trafiku në kufirin e saj javën e kaluar mes asaj që thotë se është një rritje dramatike e emigrantëve që kalojnë në territorin e saj nga Hungaria.

Austria, Republika Çeke dhe Polonia gjithashtu rifutën kontrollet në kufijtë e tyre me Sllovakinë javën e kaluar për të frenuar emigrantët që vijnë nga vendi. /Telegrafi/