Duda Balje: Kemi 20 vjet që presim për një komunë boshnjake, nuk kemi shtet rezervë

Deputetja e zgjedhur e Kuvendit të Kosovës, Duda Balje, ka reaguar me një postim të gjatë pas zhurmës që shkaktoi kërkesa e saj për krijimin e një komune me shumicë boshnjake në Kosovë – kërkesë kjo që e ka vendosur si kusht për përfshirjen në çdo koalicion qeverisës, qoftë me Albin Kurtin, qoftë me partitë opozitare.

Balje thekson se kjo nuk është një kërkesë e re, por një aspiratë mbi 20-vjeçare e komunitetit boshnjak në Kosovë. Ajo kujton se ndonëse serbët patën kërkesa për komuna të veçanta në kohën e bisedimeve në Vjenë, boshnjakët nuk e ngritën këtë çështje atëherë, por zgjodhën ta bëjnë në përputhje me ligjet e Kosovës.

“Ne nuk kërkuam komunë në Vjenë kur serbët bënin presion për komunat e tyre, por pritëm ta bëjmë atë në përputhje me ligjet tona”, shkroi ajo, duke shtuar se kërkesa nuk ka të bëjë me monoetnicitet.

Balje thekson se boshnjakët nuk kanë “shtet rezervë” dhe se Kosova është atdheu i tyre.

Ajo përmend rolin e këtij komuniteti në proceset kyçe shtetformuese, përfshirë firmosjen e Deklaratës së Pavarësisë dhe votimin e ligjeve të rëndësishme në Kuvend.

Sipas saj, kërkesa për një komunë është një hap administrativ që do të mundësojë shërbime më të lehta për qytetarët boshnjakë, pa dëmtuar bashkëjetesën me shqiptarët.

“Ne jetojmë me ju pa problem, fëmijët tanë mësojnë shqip, dhe historikisht kemi bashkëjetuar. Nuk kemi nevojë për asociacion tjetër, përveç atij të Kosovës”, shkruan ajo, duke u bërë thirrje skeptikëve të mos e barazojnë këtë iniciativë me modelin e Asociacionit të komunave me shumicë serbe.

Në fund, Balje kërkon qetësi dhe mirëkuptim, duke theksuar se çdo proces për themelimin e komunës do të jetë i gjatë dhe institucional, prandaj “nuk ka vend për frikë dhe urrejtje”.