Driton Selmanaj kërkon rinumërim të përgjithshëm të votave dhe përsëritje të votimit të diasporës

Në LDK janë shtuar zërat e anëtarëve të cilët po kërkojnë rinumërim të tërësishëm të votave.

Pas Arben Gashit e Hykmete Bajramit, një gjë të tillë e ka kërkuar edhe Driton Selmanaj.

Madje Selmanaj ka kërkuar që përveç rinumërimit, të përsëritet procesi i votimit të diasporës.

“Një proces i rregullt zgjedhor është përcaktues për të nxjerrë institucione demokratike. Çdo prekje e votës është vepër penale dhe si pasojë, abuzuesit duhet ta marrin dënimin e merituar. Siç po shihet deri më tani, votat në Qendrat Komunale të Numërimit, nuk kanë qenë në duar të sigurta dhe rrjedhimisht rezultatet nuk e pasqyrojnë vullnetin e votuesve që kanë marrë pjesë në votime. Edhe më keq është situata me votat e mërgatës”, ka shkruar Selmanaj në Facebook.

Ai ka theksuar se procesi i votimit në përfaqësitë diplomatike dhe rezultati i votave të mërgatës që kanë votuar përmes postës, kanë nxjerrë në sipërfaqe skema të organizuara për manipulim masiv të votave brenda subjekteve politike.

Lexo po ashtu Pas Gashit edhe Bajrami kërkon rinumërimin e të gjitha votave: Çdo dyshim duhet të zbardhet

“KQZ, Prokuroria dhe institucionet tjera kompetente, në kuadër të kompetencave ligjore dhe kushtetuese, duhet t’i ndërmarrin të gjitha veprimet që ta rikthejnë rregullsinë e procesit dhe me këtë abuzuesit të marrin dënimin e merituar. Vota e secilit qytetarë është e shenjtë dhe të gjithë pa përjashtim duhet të angazhohemi që ato të mbrohen me çdo kusht”, ka shtuar tutje Selmanaj.

Kandidati për deputet nga LDK ka theksuar se mbrojta e rregullsisë së procesit ku përmes votës shprehet vullneti politik i qytetarëve tanë, është misioni më patriotik që sot mund t’i bëjmë vendit tonë.

“Pa asnjë dyshim Lidhja Demokratike e Kosovës duhet ta udhëheqë këtë mision! Rinumërimi i votave në gjithë Kosovën dhe përsëritja e votimit të mërgatës, si në përfaqësitë diplomatike ashtu edhe votimi përmes postës, është e vetmja mënyrë që rikthen besimin e të gjithëve për këtë proces elektoral. Demokracia pa sigurinë e votës, ka tjetër emër”, ka shkruar Selmanaj. /Telegrafi/