Drejtori i klubit ilegal serb Trepça, Jakshiq: Nuk e dimë nëse do të zhvillohet ndeshja me Crvena Zvezdan

Drejtori sportiv i klubit ilegal serb në Kosovë, Trepçës, Bojan Jakshiq ka folur për mediat serbe në lidhje me ndeshjen e paraparë për t’u zhvilluar në Mitrovicë ndaj Crvena Zvezdas.

Është raportuar se klubi nga Beogradi to të zhvilloj sot (e mërkurë) në Mitrovicë ndeshjen ndaj Trepçës ilegale serbe nga ora 14:00 në kuadër të 1/16-tës së Kupës së Serbisë.

Por, drejtori i Trepçës serbe, Bojan Jakshiq ka deklaruar gjatë një interviste dhënë televizionit publik serb RTS, se nuk dihet ende nëse do të zhvillohet ndeshja, edhe përkundër faktit që të gjithë po bëhen gati për një gjë të tillë dhe shpresojnë që të ndodhë.

Lexo po ashtu Crvena Zvezda niset drejt Kosovës, klubi poston foto nga nisja e lojtarëve

“Ne si klub i jemi drejtuar policisë së Kosovës me një kërkesë që ata të merren më çështjen e sigurisë gjatë ndeshjes. Kjo është e tëra çfarë zyrtarisht kemi kërkuar dhe deri më tani nuk kemi marrë kurrfarë përgjigje. Pjesën tjetër e kemi kuptuar nga mediat, nuk kemi informacione tjera zyrtare”, ka thënë fillimisht Jakshiq për RTS.

Në anën tjetër pritet reagimi i policisë kufitare në pikëkalimin Jarinje, dhe aty do të mësohet nëse do t’ju lejohet kalimi futbollistëve serbë.

Lexo po ashtu Policia e Kosovës: Crvena Zvezdas do t'i ndalohet hyrja në Kosovë

“Nuk mund ta them me saktësi, rreth orës 11 do të jem në pikëkalim. Vërtetë nuk e di si do të reagojë policia”.

“Ajo çfarë kemi kuptuar nga mediat është që ndalesa që na është bërë në këtë pikëkalim nuk është tërhequr”, përfundoi drejtori i Trepçës ilegale serbe. /Telegrafi/