Donika Kadaj-Bujupi flet pas ngjarjes në veri: Ngjitjet në majat tona të bukura do t’i vazhdojmë

Derisa po vazhdonin ecjen në bjeshkët e Zubin Potokut, grupi i bjeshkatarëve “Kosovo Mountain Club” janë sulmuar me armë zjarri.

Pjesë e kësaj ecje ishte edhe ish-deputetja e Kuvendit të Kosovës, Donika Kadaj-Bujupi.

Donika bashkë me bjeshkatarët tjerë shpëtuan pa ndonjë lëndim në këtë incident.

Ajo ka treguar për Telegrafin kronologjinë e ngjarjes.

“Sot në kuadër të organizimit të “Kosovo Mountain Club” bashkë më plotë dashamirë të natyrës, u nisëm drejt majës së Shijak i Bubës në Zubin Potok. Siç u raportua edhe në media ishim cak i sulmit të armatosur nga bandat kriminale atje. Fatmirësisht nuk pati viktima. U detyruam të kthehemi për sot dhe ngjitjen e vazhduam në majën tjetër në Shalë të Bajgorës”.

“Ngjitjet në majat tona të bukura do t’i vazhdojmë edhe në ditët, javët, muajt e vitet në vijim. Dhe atë në gjithë territorin e Republikës pavarësisht tentimeve qyqare për të na ndaluar! Unë thërras institucionet që të reagojnë dhe marrin masa konkrete përtej fjalëve në mënyre që këto sulme të vazhdueshme dhe kahmotshme të ndërpriten sa më parë”, ka deklaruar më tej ish-deputetja e Kuvendit të Kosovës.

Për këtë ngjarje ka pasur reagime të shumta nga institucionet vendore, përfshirë Presidenten dhe Ministrin e Punëve të Brendshme./Telegrafi/