Dikur e mahniti botën në Britain’s Got Talent, ndërsa për shkak të sëmundjeve mund të mos këndojë më kurrë (Foto/Video)

Susan Boyle ka bërë të ditur se i ka hequr 13 kilogramë qëkur është diagnostikuar me diabet tip 2.

Këngëtarja skoceze, e cila i bë e famshme në spektaklin ‘Britain’s Got Talent’ në vitin 2009, ka treguar se mjekët i kishin thënë se duhej të humbte peshë për shëndetin e saj.

“U desh të ndaloja së ngrëni ëmbëlsira dhe torte. Është fatkeqësia e jetës time”, ka thënë ajo për The Mirror.

Diabeti nuk është problemi i vetëm shëndetësor që ka 55-vjeçarja. Ajo ka thënë se sindroma Asperger është bërë aq e rëndë, saqë nuk ka caktuar data për turneun e radhës, transmeton Telegrafi.

Përkundër se e ka lansuar albumin e ri, “A Wonderful World”, këtë muaj, Susan nuk ka kënduar që nga vera e vitit 2015.

“Nuk kam kënduar drejtpërdrejtë, sepse kam qenë e sëmurë. Përgjigja e shkurtë është se ka qenë e lidhur me sindromën Asperger”, ka thënë këngëtarja.

Sindroma Asperger është një çrregullim në zhvillimin psikik që karakterizohet me vështirësi në ndërveprimin social dhe komunikimin joverbal, i shoqëruar me forma të kufizuara dhe të përsëritura të sjelljes dhe interesave.

“Kur këndon, kapesh pas një personi. Unë fshihem pas atij personi në skenë. Mund të ndihesh sikur po vdes, por duhet të vazhdosh. Publiku dëshiron të shohë dikë të qeshur”, ka sqaruar Boyle. /Telegrafi/