Dhunimi i avokatit të Berishës, Balla: Është identifikuar njëri nga tre autorët

Ministri i Brendshëm Taulant Balla ka reaguar në lidhje me dhunimin e avokatit mbrojtës të ish-kryeministrit Sali Berisha.

Balla dënon aktin e rëndë dhe bën me dije se është identifikuar njëri prej 3 autorëve të cilët qëlluan me sende të forta avokatin në zonën e ish-Bllokut.

Gjithashtu Balla iu përgjigj dhe deklaratave të zëdhënëses së Rithemelimit, Floriana Garo, e cila tha se urdhërues i dhunimit të avokatit është kryeministri Rama.

Lexo po ashtu Goditja e avokatit të Berishës, Rithemelimi akuzon Ramën

Ministri i Brendshëm thekson se deklaratat nga Rithemelimi bëhet me qëllimin viktimizimin dhe përdorimin politik të ngjarjes nga ana e ish-kryeministrit.

Reagim i ministrit të Brendshëm, Taulant Balla:

Lexoj që zotëria i penxheres së drejtësisë ka lëshuar zëdhënësat e gënjeshtrave të tij për të sulmuar kryeministrin si urdhëruesin e një sulmi kriminal ndaj njërit prej avokatëve të tij, zotit Sokol Mëngjesi. Ngjarja e ndodhur në mëngjes është në ndjekje nga Policia e Shtetit, e cila tanimë ka identifikuar njërin prej të tre autorëve dhe po punon për identifikimin e dy të tjerëve. Kam komunikuar edhe personalisht me kolegët e avokatit sapo kam marrë dijeni dhe i falenderoj për disponimin qytetar në funksion të sqarimit të ngjarjes. Kam komunikuar edhe me mjekun që po kujdeset për shëndetin e avokatit. Duke i uruar shërim të shpejtë zotit Sokol Mëngjesi, shpreh keqardhjen që nga kati i 8 hidhet edhe në këtë rast një kazan me helm për publikun, me qëllimi vetëviktimizimin politik të një të korruptuari madhor!