Crespo tregon prapaskenat e mostransferimit te Reali: Nëse Ronaldo do të qëndronte te Interi, unë do të shkoja te Madridi

Ish-sulmuesi i klubeve nga Serie A, Hernan Crespo, ka treguar se ka mundur t’i bashkohet Real Madridit dy herë gjatë karrierës së tij.

Argjentinasi është ndër emrat më ikonikë në futbollit italian, ku ka luajtur me klube, si Parma, Inter, Lazio, Milan dhe Genoa, ndërsa ka shënuar 153 gola në 340 ndeshje të Serie A.

Në gusht të vitit 2003, ai iu bashkua Chelseat nga Interi, por u kthye vetëm një vit më pas në Itali, këtë herë te Milani.

Gjatë një bisede për kanalin e Ole në Twitch, 46-vjeçari ka rrëfyer se ka mundur të luajë edhe për Los Blancos.

“Isha duke luajtur për Lazion (në vitin 2002) dhe isha në bisedime me Interin dhe Real Madridin. Gjithçka varej nga Ronaldo. Nëse ai do të qëndronte te Interi, unë do të shkoja te Madridi”.

“Në fund, ai vendosi të shkonte te Merengues, prandaj unë nënshkrova për Nerazzurrët”, ka treguar Crespo duke shtuar se Mbretërit kishin bërë një tjetër përpjekje disa vite më vonë.

“Kisha edhe gjashtë muaj në kontratën time me Interin, ndërsa Real Madridi më kontaktoi në janar. Kam mundur t’u bashkohem, por vendosa të qëndroja dhe ta fitoja Scudetton”, ka thënë argjentinasi.

Crespo e ka fituar tri herë titullin e Serie A, në të tria rastet me Interin (2006/2007, 2007/2008 dhe 2008/2009), e ka fituar Superkupën e Italisë me katër klube të ndryshme (Parma, Lazio, Milan e Inter), ndërsa ishte pjesë e skuadrës legjendare të Parmas që e fitoi Kupën UEFA në sezonin 1998/1999. /Telegrafi/