Cikalleshi i shënoi dy herë Besiktasit, goli i fitores ishte një ‘Panenka’ mjeshtërore (Video)

Skuadra e Osmanlispor ka shënuar fitore prej 2-1 kundër Besiktasit në ndeshjen e vlefshme për të tetën e finales të Kupës së Turqisë.

Gjysma e parë nuk prodhoi gola, ndërsa të tre golat u shënuan në fraksionin e dytë, edhe atë në minutat e fundit.

Të parët kaluan në epërsi mysafirët me golin e Mustafa Pektemek në minutën e 83-të. Mirëpo, reagimi i vendasve ishte i shpejtë, edhe atë përmes futbollistit shqiptar, Sokol Cikalleshi.

27-vjeçari e barazoi rezultatin vetëm pas tri minutash duke e pranuar topin në zonë dhe e mposhti portierin kundërshtar (86′).

Dy minuta më pas u akordua penalti në favor të ekipit nikoqir dhe përgjegjësinë për ekzekutimin e njëmbëdhjetëmetërshit e mori sulmuesi shqiptar.

Cikalleshi realizoi një ‘Panenka’ shumë të bukur nga pika e bardhë për t’ia siguruar fitoren skuadrës së tij.

Megjithatë, në çerekfinale të Kupës së Turqisë u kualifikua Besiktasi me rezultat të përgjithshëm prej 5-3, duke qenë se në takimin e parë kishte fituar me rezultat 4-1. /Telegrafi/

http://www.dailymotion.com/video/x6d9qbn

http://www.dailymotion.com/video/x6d9qmu

https://www.youtube.com/watch?v=Obl0WVXVXjs&feature=youtu.be