Çfarë po ndodh sot me Michael Schumacheri, ndërsa Ferrari poston një foto të tij

Piloti më i madh në historinë e Formula 1, gjermani Michael Schumacher sot mbushi 56 vite dhe me rastin e ditëlindjes së shtatë herë kampionit të botës, Ferrari ka bërë të ditur edhe një mesazh emocionues.

“Ti je gjithmonë në zemrat tona. Gëzuar ditëlindjen, Michael”, shkruan ata në një urim në rrjetet sociale krahas një fotoje të shtatë herë kampionit të botës në Formula 1 në prezantimin zyrtar në Maranello në 1996, pranë një Ferrari F310 që ishte e para nga shumë vetura të kuqe që ka vozitur në karrierën e tij.

Fatkeqësisht, pak ditë më parë u bënë 11 vjet që kur piloti më i madh në historinë e Formula 1, gjermani Michael Schumacher, u lëndua rëndë gjatë skijimit në Alpet Franceze dhe gjendja e tij shëndetësore është ende e mbuluar me mister.

Shtatë herë kampioni i botës pësoi aksidentin më 29 dhjetor 2013 teksa po bënte ski në Alpet franceze, duke goditur kokën në një shkëmb. Edhe pse mbante kaskë skijimi, ai ka pësuar lëndime të rënda në kokë.

Që nga ajo kohë mediat vetëm spekulojnë për shëndetin e tij dhe familja ka heshtur për gjithçka. Situata shëndetësore e Schumacher u bë kështu një nga sekretet më të mëdha të sportit të sotëm.

Always in our hearts ❤️

Tanti Auguri, Michael. pic.twitter.com/EBAPC8d4yZ

— Scuderia Ferrari HP (@ScuderiaFerrari) January 3, 2025

Gjatë karrierës së tij, Schumacher fitoi shtatë tituj rekord të kampionatit botëror dhe një rekord 91 fitoresh. Dy titujt e parë të kampionatit i fitoi në Benetton (1994, 1995), dhe nga viti 2000 deri në fund të vitit 2004, Schumacher fitoi 5 tituj radhazi me Ferrarin.

Mori pjesë në 308 gara të Çmimit të Madh dhe 155 herë u ngjit në shkallët e podiumit.