I caktohet një muaj paraburgim për policin që dyshohet se shkaktoi aksidentin me tre të vdekur në Çubrel

Gjykata e Mitrovicës ka vendosur masën e paraburgimit prej 30 ditësh për policin e dyshuar se ka shkaktuar aksidentin rrugor në Çubrel të Skenderajt, ku humbën jetën tre persona.

Këtë e ka konfirmuar zëdhënësja e gjykatës, Hateme Haxhaj.

Aksidenti, i cili ndodhi midis një automjeti civil dhe një automjeti të policisë, solli pasoja tragjike.

Përveç tre viktimave që humbën jetën, pesë persona të tjerë u lënduan, ndër të cilët katër ishin zyrtarë policorë.

Lexo po ashtu Tre të vdekur nga aksidenti në magjistralen Mitrovicë-Pejë

Seanca dëgjimore për këtë rast u mbajt në hapësirat e Qendrës Klinike Universitare të Kosovës, pasi i dyshuari po ndërmerrte trajtim mjekësor për shkak të aksidentit.

Sipas gjykatës, dyshimi kryesor është se i pandehuri nuk e ka përshtatur shpejtësinë e lëvizjes në rrugën Pejë – Mitrovicë, në afërsi të fshatit Çubrel, gjë që çoi në aksidentin fatal.

Ky incident ka shkaktuar tronditje në shoqërinë kosovare, duke nxjerrë në pah edhe një herë rëndësinë e respektimit të rregullave rrugore dhe sigurisë në trafik.

Hetimet për rastin vazhdojnë, ndërsa familjet e viktimave presin drejtësi për humbjet e tyre të përjetshme./Telegrafi/