“Breaking Borders” nga DokuFest dhe SDI bashkon filmbërësit për të rikonceptuar bashkëpunimin në botën e polarizuar

DokuFest dhe Instituti Skocez për Dokumentarë (SDI) kanë shpallur regjisorët alumni të përzgjedhur për programin e rezidencës “Breaking Borders”.

Sipas njoftimit të DokuFestit, katër regjisorë nga secili vend përkatës do të eksplorojnë perspektiva të ndryshme, duke nxitur një sinergji krijuese domethënëse.

“Të udhëhequr nga mentorët me përvojë Saeed Taji Farouky dhe Kumjana Novakova, ata do të zhvillojnë projektet e tyre filmike të frymëzuara nga tema “Rikonceptimi i bashkëpunimit në një botë të polarizuar””, thuhet në njoftim, raporton Telegrafi.

Ky bashkëpunim, sipas Dokufestit, do të bashkojë platformën dinamike të DokuFest në Evropën Juglindore me ekspertizën globale të SDI, duke krijuar një nismë inovative për mbështetjen e kineastëve të rinj dhe nxitjen e dialogut ndërkulturor.

“Partneriteti pasqyron një vizion të përbashkët: fuqizimin e regjisorëve si rrëfimtarë dhe agjentë të ndryshimit. Ai synon të lidhë Mbretërinë e Bashkuar dhe Ballkanin përmes bashkëpunimit krijues dhe trajtimit të çështjeve shoqërore urgjente përmes filmbërjes dokumentare”, thuhet në njoftim, raporton Telegrafi.

Breaking Borders është një projekt i përbashkët i realizuar nga DokuFest dhe Instituti Skocez për Dokumentarë, mbështetur nga British Council. /Telegrafi/