Bizneset e vogla rurale në Maqedoni me vështirësi për të depërtuar në treg (Video)

Rajoni i Pellagonisë që në një panair në Shkup është paraqitur me emrin “Motor i i ri ekonomik” ku bizneset e vogla kishin nxjerrë produktet e tyre, ku mbizotëronin ushqimet, por nuk mungonin as punimet e dorës.

Vizitorët nuk ngurronin të provojnë nga ushqimet tradicionale të Pellagonisë në mesin e të cilave padyshim dominonin ëmbëlsirat.

Larisa Lauçeska Vergoska merr pjesë në panairin e rajonit të Pellagonisë. Ajo thotë se këso panaire janë më se të nevojshme për promovimin e bizneseve të vogla.

“Për momentin, në shtëpi jam duke përgatitur kavanozë me ëmbëlsira që janë një farë lloj bonbonierash unikatë. Kjo gjë, njerëzve u vjen shumë interesant, por aktualisht reklamimin e këtyre e bëj vetëm nëpërmjet faqes së Fejsbukut”, u shpreh Larisa Lauçeska Vergoska për TV21 Maqedoni, Pjesëmarrëse në panair.

Atanas Dimitrov, koordinator i projektit të USAID për zgjerim të bizneseve të vogla, thotë se ky është panairi i dytë me radhë i organizuar, qëllimi i të cilit është që nëpërmjet të ekspozimit të produkteve të realizojnë bashkëpunim me kompani dhe klientë të mundshëm.

“Besojmë që në Maqedoni ka potencial për zhvillimin e bizneseve të vogla. Për këtë arsye mundohemi që sipërmarrësve të vegjël dhe të mëdhenj artizanalë t’iu ndihmojmë që prodhimet e tyre t’i sjellin në Shkup. Konsiderojmë se mënyra më e mirë për të siguruar zhvillimi i këtyre bizneseve që veprojnë në rajone të izoluara, është që atyre t’u mundësohet të shesin në një treg më të madh, si për shembull në Shkup dhe dalëngadalë në tregje ende më të mëdha”, tha Atanas Dimitrov, Koordinator i projektit të “USAID”.

Daniela Cvetanovska kryetare e një organizate jo-fitimprurëse thotë se vështirësitë kryesore që kanë bizneset e vogla është konkurrenca nga se kompanitë e mëdha nuk lejojnë që biznese më të vogla të futen në treg, për shkak se ato e kanë primatin, sa i përket sasisë së prodhimit.

“Shpeshherë, bizneset e vogla shpërfillen nga firmat e mëdha. Sipas meje, kjo ndodh për shkak të sasisë së prodhimeve që ata i nxjerrin në treg, sepse, realisht, firmat më të vogla nuk janë në gjendje të nxjerrin në treg sasi të njëjtë prodhimesh, krahasuar me firmat e mëdha. Por sa i takon cilësisë së prodhimeve të firmave më të vogla, e them me përgjegjësi se ajo është shumë më e mirë, se e firmave më të mëdha, të paktën këto firma që ndodhen sot këtu”, tha Daniela Cvetanovska, Drejtuese OJQ-je.

Ky panair është i mbështetur nga USAID – dhe i ndihmuar financiarisht nga Ambasada Zvicerane. Panairi në “Dhomën publike” do të zgjasë për 2 ditë./Telegrafi/