Bislimi: Ne duhet të përkujdesemi që dëmi ekonomik të jetë më i vogël

Ministri në detyrë i Financave dhe Transfereve, Besnik Bislimi në një konferencë për media ka thënë se duhet të kujdesemi që dëmi ekonomik i shkaktuar nga pandemia e COVID-19 të jetë më i vogël.

Ai duke folur për Pakon Fiskale Emergjente të krijuar nga qeveria, ka shtuar se një pjesë të kësaj pakoje do të mbështetet me financimet nga jashtë.

“Kur flasim për pakon dhe vlerën e saj prej 179.6 milionë euro, por duhet të shikohet edhe pjesa tjetër që reflektohet me rënie të të hyrave buxhetore. Parashikimet që po bëhen për ndikimin në ekonomi variojnë me një marzhë gabimi me qindra përqindje, për arsye se askush nuk e di sa do të zgjat kriza dhe rrjedhimisht nuk ka logjikë të miratohet pako afatgjate kur nuk e dimë sa do të jetë dëmi ekonomik. Ne duhet të përkujdesemi që dëmi ekonomik të jetë më i vogël si për këtë gjeneratë apo gjeneratat e ardhshme”, tha Bislimi, shkruan Telegrafi.

Ai tregoi se një pjesë e kredive nuk mund të merren në këtë kohë pasi sipas tij, Kuvendi ka vendosur ta bllokojë qeverinë në adresimin e nevojave.

“Jemi duke u munduar që një pjesë të madhe të pakos ta mbështesim me financim nga jashtë dhe për këtë kemi kërkuar kredi nga jashtë. Fatkeqësisht një pjesë të kredive nuk kemi mundur t’i marrim në këtë kohë, pasi që Kuvendi ka vendosur ta bllokojë qeverinë në adresimin e nevojave”.

Lexo po ashtu Kurti: Pakoja Fiskale Emergjente është e mjaftueshme, ata që po kritikojnë po e pengojnë rritjen e buxhetit të kësaj pakoje

“Ne e kemi marr një kredi prej Fondit Monetar në vlerë prej 51.6 milionë euro dhe fatmirësisht kjo kredi nuk ka nevojë të shkoj në Kuvend. Mirëpo, fondi i Bashkimit Evropian prej 25 milionë euro që është mjaftë i rëndësishëm për Fondin për Garantimin e Kredive është bllokuar nga Kuvendi. Mesazhi im është që në vend të bllokadës t’i bashkojmë energjitë me qëllim që ta kalojmë sa më shpejtë këtë krizë, mirëpo harroni që mund ta bllokoni qeverinë”, tha ai. /Telegrafi/