Besnik Osmani nga Presheva ende i zhdukur, fati për gjetjen e tij në duart e policisë lokale të Preshevës

Tash e pesë ditë, Komuna e Preshevës është vënë në kërkim të Besnik Osmanit, për fatin e të cilit askush nuk di asgjë, që nga data 24 mars e këtij viti.

Familjarë, miq e qytetarë janë paraqitur vullnetarisht për të ndihmuar për ta gjetur, por deri më tani nuk asnjë gjurmë për të. Kryetari i Komunës së Preshevës, Shqiprim Arifi ka thënë për Telegrafin se deri më tani kanë nisur të gjitha procedurat për kërkimin e tij dhe janë njoftuar autoritetet në Kosovë e Serbi, por ende nuk kanë marrë asnjë informacion.

Besnik Osmani nga Presheva, i lindur me 12.05.1978, që prej datës 24 mars rezulton i zhdukur.

Besniku ishte larguar nga shtëpia pasditen e 24 marsit ku ishte nisur drejt Preshevës, mirëpo i njëjti nuk kishte arritur në destinacionin e tij.

Siç është bërë e ditur, kontakti i fundit i tij ishte pika kufitare Muçibabë, Kosovë-Serbi rreth orës 17:00.

Kryetari i Komunës së Preshevës, Shqiprim Arifi ka thënë për Telegrafin se deri më tani me gjithë përpjekjet që kanë bërë, ende nuk kanë asnjë informacion për fatin e Besnik Osmanit.

“Si shtab komunal për situata të jashtëzakonshme, prej momentit që jemi njoftuar me rastin e zotëri Besnik Osmanit, kemi marrë masa përkërkimin e tij. Rastin e kemi paraqitur tek të gjitha institucionet e Ministrisë së Punëve të Brendshme të Republikës së Kosovës dhe asaj të Serbisë.  Gjithashtu jemi në komunikim të vazhdueshëm me familjarët e tij si dhe kemi apeluar te qytetarët tonë që për çdo informacion të paraqiten te kujdestaria e shtabit komunal, por edhe në policinë lokale”, tha Arifi.

Lexo po ashtu I zhdukur që gjashtë ditë, Komuna e Preshevës vihet në kërkim të Besnik Osmanit

Ndër të tjera, Arifi bëri të ditur se një grup qytetarësh nga Presheva, për disa ditë me radhë e kanë kërkuar Besnik Osmanin, por që fatkeqësisht nuk kanë arritur ta gjejnë, duke mbetur kështu fati i tij në dorën e policisë lokale në Presheve dhe Ministrisë së Punëve të Brendshme të Serbisë.

“Ka pasur edhe një angazhim të qytetarëve, të rinj e të moshuar që kanë dal vullnetar për të kërkuar zotëri Besnik Osmanin, disa ditë e kanë kërkuar por pa sukses, është rasti i cili na ngarkon në këtë moment kur po përballemi edhe me COVID-19 dhe jemi të shqetësuar. Por, tani përgjegjësia më e lartë është në policinë lokale dhe ministrinë e Punëve të Brendshme sesa tek ne”, tha Arifi për Telegrafin.

Ditë më parë, bashkëshortja e Besnikut, Vjollca Osmani në një prononcim për Telegrafin ka treguar rreth largimit të bashkëshortit të saj nga shtëpia dhe humbjes së kontaktit me të, tashmë që gjashtë ditë.

“Më 24 mars, burri ka dashtë me shku në Preshevë për arsye se ai ka qenë financier në bibliotekën “Mehet Isufi” në Preshevë. Disa kolegë e kanë thirr edhe i kanë tregu se një sistem i punës po ndryshon shkaku i gjendjes së pandemisë dhe po duhet me marrë një pajisje. Edhe pse unë insistova mos me shku, ai më tha se nuk mundet mi lënë njerëzit pa rroga, tha po e thërras drejtorin e bibliotekës që me ma leshu një leje qarkullimi, mirëpo drejtori me sa kuptova unë i tha që nuk ka mundësi me ba një gjë të tillë…”, tha Osmani.

Lexo po ashtu Flet bashkëshortja e Besnik Osmanit i cili rezulton i zhdukur qe gjashtë ditë: Dyshoj se është arrestuar nga xhandarmëria serbe

Osmani më tej vazhdon rrëfimin duke treguar se bashkëshorti nuk i ishte lajmëruar as që ka arritur në kufi.

Vjollca më tej thekson se pasi kanë kaluar 24 orë, ka shkuar në stacionin policor në veri në Vranjevc të Prishtinës dhe e ka paraqitur rastin.

Besniku kishte tentuar ta kalojë kufirin Kosovë-Serbi në fshatin Muçibabë, por pa sukses.

Lexo po ashtu Prej pesë ditësh rezulton i zhdukur - familja kërkon ndihmë për gjetjen e Besnik Osmanit nga Presheva

Bashkëshortja e tij, Vjollca tregon se në këtë vend pas disa kërkimeve që i kanë bërë disa nga banorët e kanë gjetur veturën e Besnikut.

Ajo në fund pati një kërkesë për autoritet shqiptare dhe serbe.

“Ne si familje kërkojmë nga të dy anët që të na konfirmojnë që Besniku është diku”, ka thënë Vjollca. /Telegrafi/