Begaj kërkon qasje te re në dialogun Kosovë-Serbi, Presidenti kroat: BE-ja e pasinqertë me Shqipërinë dhe Kosovën, i vetmi jo-shqiptar që kam kërkuar njohjen e Kosovës

Presidenti i Shqipërisë Bajram Begaj në një konferencë të përbashkët që ka mbajtur me homologun e tij kroat Zoran Milanoviç ka dënuar sulmin e 24 shtatorit në veri të Kosovës.

Në fjalën e tij ai theksoi se vlerëson mbështetjen e Kroacisë që i jep Kosovës duke shtuar se Serbia dhe Kosova duhet të kenë një qasje te re të dialogut.

“Nënvizova se pas aktetit të Hamasit ndaj izraelit bëhet e domosdoshme që BE dhe NATO të dekurajojnë qasjen provokative të Serbisë ndaj Kosovës. E vlerësova mbështetjen që Kroacia i jep Kosovës. Që prej sulmit të 2 shtatorit gjërat nuk janë më si më parë, dhe negociatorët duhet të kenë një qasje te re të dialogut”, tha Begaj.

Në anën tjetër, Presidenti i Kroacisë Zoran Milanoviç tha se vendet e Bashkimit Evropian po tregohen të pasinqertë me Shqipërinë dhe Kosovën.

Ai tha se është i vetmi jo shqiptar i cili po kërkon që Kosova të njihet si shtet, pasi sipas tij, Evropa nuk e përmend. Sipas Milanoviç edhe pse kanë kaluar 11 vite dhe Shqipëria ka ecur përpara, Evropa prapë duket se ka prioritete të tjera.

“Në 20 vite jam dëshmitar i zhvillimit të Shqipërisë në të gjitha aspektet. Fatkeqësisht ky progres nuk është përcjellë me reagimet e duhura institucionale nga ana e Bashkimit Evropian. Dua të them diçka që e kam thënë për herë të parë në vitin 2012, kur kryeministër ishte Sali Berisha, por rrethanat ishin të ngjashme. Në atë kohë Shqipëria kishte 3 vite që ishte anëtare e NATO-s. Në atë kohë Serbia dhe Mali i zi kishin avancuar, por për Shqipërinë nuk ndodhte asgjë. Ky absurd i cili ishte i dukshëm atëherë është i dukshëm edhe tani”, tha Presidenti kroat.

“Një shtet që është mjaft i organizuar që të jetë anëtare në NATO, në të njëjtën kohë avancimi drejt një aleancë tjetër si Bashkimi Evropian, aty Shqipëria nuk ka mundur as të bëjë hapin e parë, madje as të ngrihet nga shtrati. Kjo është e pasinqertë, nuk është siç duhet. Tashmë pas 11 vitesh, kemi lëvizur pak por jo shumë”, tha ai.

“Kjo flet shumë për Bashkimin Europian, për prioritetet tona. Fakt është që jam ndër të vetmit që nuk jam shqiptar, dhe kam bërë në New York thirrjen për të pranuar Kosovën. Kjo është tema për të cilën foli edhe zoti President. Këtë fakt e di e gjithë Europa, por nuk do ta përmendi, kjo nuk është shumë e mirë dhe e sinqertë. Kjo është e padobishme e madje e dëmshme për ne. Kemi 12 vjet që dëgjojmë argumente të njëjta e ndërsa koha kalon, pengesat bëhen më të vështira. Shuma pak gjëra po bëhen”, tha presidenti kroat. /Telegrafi/