Barcelona ka marrëveshje me Depayn, por transferimi i holandezin në Camp Nou mund të dështoj

Memphis Depay mund të quhet si futbollist i ri i Barcelonës, edhe pse ende nuk ka ardhur zyrtarizimi.

Sulmuesi holandez do të largohet në fund të sezonit nga Lyoni, pasi do t’i skadojë kontrata me gjigantin francez.

Mundo Deportivo ka raportuar se Barcelona ka disa javë që ka arritur marrëveshjen personale me lojtarin, por që ende nuk ka ardhur zyrtarizimi.

Gjithsesi sipas mediumit katalunas kjo marrëveshje mund të prishet, pasi drejtuesit e Barcelonës ende nuk e kanë konfirmuar për edicionin e ri trajnerin holandez Ronald Koeman.

Depay ka pranuar të bashkohet me katalunasit vetëm nëse trajner do të jetë bashkëkombësi i tij, në të kundërtën marrëveshja mes palëve do të prishet.

Lajmet e fundit që kanë ardhur nga Spanja raportojnë se presidenti Joan Laporta nuk është i kënaqur me trajnerin Koeman pas rezultateve të fundit të Barcelonës.

Gjithsesi numri një i gjigantit katalunas do të ketë një takim me Koeman për të diskutuar rreth të ardhmes së tij.

Në rast se Koeman konfirmohet në krye të Barcelonës për edicionin 2021/22, atëherë pritet të zyrtarizohet Depay si përforcimi i parë i gjigantit katalunas.

Lexo po ashtu UEFA hap zyrtarisht hetime për Real Madridin, Barcelonën dhe Juventusin rreth Superligës Evropiane

Nëse një gjë e tillë nuk ndodh, atëherë sulmuesi holandez do të shikojë tjera opsione, ku pëlqehet shumë nga Roma, Milan, Juventus dhe Borussia Dortmund.

27-vjeçari këtë edicion ka kaluar nëpër një formë fantastike, ku në 38 ndeshje zyrtare ka shënuar 21 gola dhe ka asistuar në 10 të tjerë. /Telegrafi/