Banorët e fshatrave Poçest e deri në Krestovc të Pejës përballen me mungesë të energjisë elektrike, kërkojnë ndërrimin e sistemit të vjetër

Asamblisti Naim Bytyqi nga radhët e Aleancës për Ardhmërinë e Kosovës e ka ndarë një shqetësim të banorëve të fshatrave të Poçestës dhe Krestovac të Pejës, të cilët po përballën me mungesë të energjisë elektrike për shkak të sistemit të vjetër.

Bytyqi në një deklaratë për Telegrafin ka thënë se banorët e këtyre zonave vazhdojnë të përballen me mungesa të energjisë për shkak të rrjetit të vjetruar, i cili daton që nga vitet 1960.

Ai ka potencuar se ka bërë kërkesë një vit më parë për ndërrimin e këtij rrjeti por nuk është ndërmarrë asnjë gjë deri më tani.

“Ekipet e KEDS-it po vijnë po e sanojnë dëmin te trafoja, ndërsa këtë dëm po e shkakton linja e vjetruar në lagjen ‘Sadri Meta’. Pikërisht për këtë linjë unë kam bërë kërkesë vite më parë që të bëhet ndërrimi i kësaj linje (shtyllat dhe telat)”, ka thënë Bytyqi.

Ai po ashtu ka shtuar se nuk është problemi te ekipet e KEDS-it, por tek menaxhmenti.

“Ekipet i falënderoj që vijnë në vazhdimësi për ta sanuar dëmin aty te trafoja, ndërsa menaxhmentin e fajësoj që nuk po e ndërron atë pjesë të rrjetit i cili dyshohet që po e shkakton dëmin”, tha ai.

Bytyqi ka bërë thirrje që të prehen edhe degët e pemëve që varen mbi linjat elektrike, të cilat përbëjnë një rrezik shtesë për banorët, përfshirë edhe nxënësit që kalojnë në këtë zonë. /Telegrafi/