Një model flokësh ideal për ata që duan ndryshime, por jo shumë drastike
Nëse jeni në kërkim të një stili të ri, mund të frymëzoheni nga aktorja Daisy Edgar-Jones, e cila bëri bujë me balluket e holla.
Për një kohë, balluket “perde” ishin obsesioni kryesor i shumë vajzave, por tashmë janë zëvendësuar nga një version i ngjashëm, me ndryshime të lehta. Balluket e holla shpesh duken pak të çrregullta – dhe pikërisht ky është sharmi i tyre. Nuk kërkojnë shumë përpjekje për t’u stilizuar; mjafton një prekje minimale për t’i dhënë fytyrës një pamje të freskët dhe të lezetshme.
Ky model është një interpretim modern i ballukeve klasike, por me shtresa të buta dhe të teksturuara që e kornizojnë fytyrën, duke sjellë një pamje të sofistikuar, por të lirshme. Ndryshe nga balluket e dendura e të rënda, ato janë të lehta, përmes fijeve të holla që lënë ballin lehtësisht të dukshëm.
Kur përshtaten me formën e duhur të fytyrës, balluket e holla theksojnë tiparet, duke tërhequr vëmendjen tek sytë dhe mollëzat. Kështu krijohet një pamje më harmonike dhe e balancuar – ndryshimi ideal për një dukje vjeshtore, transmeton Telegrafi.
“Janë më të shkurtër në qendër dhe gradualisht zgjaten deri në gjatësinë e mollëzave. Veçanërisht i përshtaten fytyrave të rrumbullakëta, pasi i stilizon dhe u jep harmoni, duke e kornizuar fytyrën në mënyrë natyrale”, shpjegon Saly Pérez Conde, stiliste flokësh në sallonin Verónica Puertas në Pontevedra.
Sipas saj, sekreti i ballukeve të holla qëndron tek lehtësia. Fijet e holla dhe jo të dendura krijojnë një efekt spontan e të çlirët, por në fakt çdo detaj është i menduar me kujdes: pak më të shkurtra në qendër dhe më të gjata anash, për të dhënë stil dhe për të kornizuar bukur fytyrën.
/Telegrafi/
