Avokati Virtyt Ibrahimaga ka reaguar lidhur me situatën e krijuar nga bllokada institucionale dhe debatet rreth përbërjes së Gjykatës Kushtetuese, konkretisht për caktimin e gjyqtarit Radomir Laban si raportues në rastin për rendin kushtetues.
Në një postim në Facebook, ai ka komentuar deklaratat e presidentes Vjosa Osmani, e cila ditë më parë shprehu shqetësime për informacione rreth gjyqtarit Laban, por megjithatë theksoi se ai ishte caktuar gjyqtar raportues.
Sipas Ibrahimagës, bllokada institucionale është shumë më e dëmshme për vendin sesa çdo dyshim për jo-lojalitetin e një gjyqtari të vetëm.
“Bllokada institucionale është më e dëmshme sesa dyshimi për jo-lojalitet shtetëror të një gjyqtari të vetëm të Gjykatës Kushtetuese”, ka shkruar ai.
Avokati thekson se antagonizmat e ashpra politike mes partive po pengojnë formimin e institucioneve dhe kjo, sipas tij, po e çon vendin drejt një krize të thellë të sistemit.
“Kjo krizë nuk rezulton vetëm me jo-stabilitet politik, por godet zemrën e shtetit – funksionalitetin, legjitimitetin e tij si dhe besimin në demokraci si sistem. Pasojat mund të jenë të pariparueshme”, paralajmëron ai.
Ibrahimaga thekson se në një shtet të ri si Kosova, çdo krizë e brendshme është një dhuratë për agjendat që nuk e duan një shtet funksional.
Ai ka një mesazh të qartë për bartësit e institucioneve dhe liderët politikë:
Bindjet personale nuk janë më të rëndësishme se institucioni që përfaqësojnë;
Interesat momentale partiake nuk janë më të rëndësishme se shteti;
Institucioni nuk është arenë e betejave të egra politike – është themeli i përbashkët i një shoqërie të lirë.
“Kur një institucion dështon, nuk dështon vetëm një individ – rrezikohet vetë rendi kushtetues”, përfundon reagimin e tij Ibrahimaga./Telegrafi/
