Asambleisti i PDK-së në Mitrovicë, Riza Haziri jep dorëheqje

Asambleisti i PDK-së në Kuvendin e Komunës së Mitrovicës, Riza Haziri, ka dhënë dorëheqje nga kjo pozitë, pasi që Agjencia Kundër Korrupionit ka konstatuar se ai ka konflikt interesi më pozitë që e mbanë në Universitetin e Mitrovicës “Isa Boletini”, ku punon si zyrtar i këtij institucioni arsimor.

E gjithë kjo vjen pasi që portalit Veriu.info më 15 shkurt, kishte dërguar pyetje në Agjencinë Kundër Korrupsionit ku kishte pyetur se a gjenden në konflikt interesi Riza Haziri i PDK-së dhe Latif Latifi i Vetëvendosjes.

Dorëheqjen e ish nënkryetarit të komunës, Riza Hazirit, e konfirmon edhe zyra për informim e komunës së Mitrovicës, e cila në një përgjigje për Veriu.info thotë: “Po, më datë 12.05.2016 përmes deklaratës së protokoluar me numër 02/031 – 34123, anëtari i Kuvendit Riza Haziri ka paraqitur dorëheqjen e parevokueshme nga pozita e anëtarit të Kuvendit të Mitrovicës. Në arsyetimin e dhënë në deklaratë ai ka thënë se këtë po e bënë për shkak se Agjensioni Kundër Korrupsionit ka vlerësuar se pozita e shërbyesit civil bie ndesh me ligjin”.

Pas dorëheqjes së Riza Hazirit, vendin e tij do ta zë Mehdi Haxha, i cili është kryetar i Rinisë së PDK-së për Mitrovicë dhe zëdhënës i degës të partisë më të madhe opozitare.

Veriu.info mëson se Latif Latifi i VV-së pritet ta ngrijë pozitën në Universitetin e Mitrovicës, në mënyrë që të shmang konfliktin e interesit, ndërkohë që ende Agjencia Kundër Korrupsionit nuk i ka publikuar vendimet për këta dy zyrtarë.

Burime nga AKK-ja bëjnë të ditur se gjatë dhënies së deklaratave të tyre, është mësuar se edhe një asambleist i PDK-së është në konflikt interesi, pasi që mbanë pozitë menaxheriale në një shkollë.

Ndryshe, Ligji për Shërbyesit Civil ua pamundëson nëpunësve mbajtjen e pozitave politike në institucione, pasi që neni 17 thotë: “Nëpunësit civilë mund të mbajnë, përkohësisht, pozita politike. Gjatë mandatit të tyre në këto pozita, statusi i tyre i nëpunësit civil pezullohet për shkak të mospërputhshmërisë ndërmjet emërimit politik dhe statusit të nëpunësit civil”.